⛪️ 🐄 Гродзенская дыяцэзія абвясціла збор сродкаў на аднаўленне касцёла ў Сапоцкіне, які пацярпеў ад пажару
Гродзенская дыяцэзія абвясціла збор ахвяраванняў на аднаўленне касцёла Узнясення Найсвяцейшай Дзевы Марыі і святога Язафата ў Сапоцкіне, які моцна пацярпеў у выніку пажару.
Дапамагчы можа любы ахвотны — парафія апублікавала банкаўскія рэквізіты для добраахвотных ахвяраванняў. Сабраныя сродкі накіруюць на аднаўленне даху, унутранага ўбранства і касцёльных кніг.
Рэквізіты парафіі для ахвяраванняў:
РО «Религиозная община приход костела Вознесения на небеса Пресвятой Девы Марии и святого Иосафата в г. п. Сопоцкин Гродненского района Гродненской епархии Римско-католической Церкви в Республике Беларусь»
УНП 500030886
р/с BY56 AKBB3015 0000 4672 4400 0000
БИК AKBBBY2X
добровольные пожертвования на восстановление костела
Пажар адбыўся ў нядзелю, 14 снежня, каля 7-й раніцы. На месцы працавалі 47 ратавальнікаў, было задзейнічана 16 адзінак тэхнікі. У выніку агню пашкоджаны дах будынка, закураны сцены, пацярпела ўнутранае аздабленне святыні.
Для мясцовай супольнасці гэта стала цяжкім ударам, асабліва напярэдадні Калядаў. Усе набажэнствы цяпер праходзяць у канферэнц-зале Дома Міласэрнасці. Пасля пажару жыхары Сапоцкіна самі далучыліся да прыбірання: выносілі абгарэлыя элементы даху і мылі сцены.
Як паведамляе grodnensis.by, касцёл у Сапоцкіне — адна з найстарэйшых святыняў Беларусі. Яго гісторыя пачынаецца ў XVIII стагоддзі: спачатку на гэтым месцы стаяў драўляны храм, які пазней перабудавалі ў мураваны. У XIX стагоддзі касцёл рэстаўравалі, у савецкі час ён быў закрыты і выкарыстоўваўся не па прызначэнні. Дарэчы, пажар у святыні ўжо здараўся — 15 снежня 1989 года тады згарэў галоўны алтар.
