Ҡалтасы мәктәбендә психология-педагогия класы асылды
Был класта бөтәһе 14 бала уҡый. Уларҙы уҡытыусы-психолог, тәрбиәсе, дефектолог, вожатый йүнәлештәре буйынса әҙерләйәсәктәр.
Ҡалтасы районының 2-се мәктәбендә “Йәштәр һәм балалар” милли проекты (национальный проект “Молодежь и дети”) ярҙамында профилле психологик-педагогик класс асылды, тип хәбәр иттеләр район хакимиәтенән.
Был класта бөтәһе 14 бала уҡый. Уларҙы уҡытыусы-психолог, тәрбиәсе, дефектолог, вожатый йүнәлештәре буйынса әҙерләйәсәктәр. Дәрестәрҙә уҡыусылар психология һәм педагогика нигеҙҙәрен үҙләштерәсәк, шулай уҡ лидерлыҡ сифаттарын үҫтерәсәк. Программаны республиканың педагогия колледждары һәм М.Аҡмулла исемендәге Башҡорт дәүләт педагогия университеты менән берлектә тормошҡа ашырырға планлаштыралар.
"Ысын педагог – ул белемде тапшырыусы уҡытыусы ғына түгел, ә остаз, илһамландырыусы, асыштар һәм үҙ-үҙеңде танып белеү донъяһына алып барыусы. Тап ошондай профессионалдарҙы яңы профилле класс уҡыусылары әҙерләргә тейеш", - тип билдәләне Ҡалтасы районы хакимиәтенең эштәр идарасыһы Сергей Макаров.
“Йәштәр һәм балалар” милли проекты таланттарҙы үҫтереү һәм йәштәрҙең үҙҙәрен тормошҡа ашырыу өсөн мөмкинлектәр булдырыуға йүнәлтелгән. Милли проект үҙәгендә – мәктәптәр төҙөү һәм ремонтлау, уҡытыусыларҙың квалификацияһын күтәреү, уҡытыуҙың яңы методикаларын һәм уҡытыу өсөн уңайлы шарттар булдырыу. Милли проект шулай уҡ Донъя кимәлендәге кампустар селтәрен үҫтереүҙе һәм “Приоритет 2030” программаһы буйынса юғары уҡыу йорттарына ярҙам итеүҙе күҙ уңында тота. Яңыртылған милли проекттар РФ Президенты Владимир Путин ҡарары буйынса 2025 йылдан тормошҡа ашырыла.
Фото: Ҡалтасы районы хакимиәтенең "Бәйләнештә"ге сәхифәһенән.
Беҙҙең МАХ каналына https://max.ru/gazetabashkortostan ҡушылығыҙ!