🥇 16 снежня ў Еўрапарламенце ўручаць прэмію Андрэя Сахарава. За гродзенскага палітзняволенага журналіста Анджэя Пачобута яе атрымае ягоная дачка
Прэмію імя Андрэя Сахарава «За свабоду думкі», прысуджаную гродзенскаму палітзняволенаму журналісту і актывісту польскай меншасці ў Беларусі Анджэю Пачобуту, у Еўрапарламенце атрымае ягоная дачка Яна Пачобут. Яе будуць суправаджаць кіраўніца Падляшскага аддзела арганізацыі «Вспульнота Польска» Анна Кетліньска і дарадца маршалка Сената па справах польскай дыяспары Роберт Тышкевіч, паведамляе «Гарадзенская праваабарона».
Яшчэ адна сёлетняя лаўрэатка прэміі — журналістка з Сакартвэла Мзія Амаглабелі — таксама не зможа прысутнічаць на цырымоніі. Яе будуць прадстаўляць журналістка выдання Gazeti Batumelebi Ірма Дзімітрадзэ і намесніца дырэктара Фонду грамадзянскай супольнасці Сакартвэла Хатуна Джынджыхадзэ.
Анджэй Пачобут — журналіст з Гродна, блогер і даўні карэспандэнт выдання «Gazeta Wyborcza». Ён быў затрыманы 25 сакавіка 2021 года ў Гродне, а праз два гады асуджаны на восем гадоў пазбаўлення волі паводле палітычна матываваных абвінавачанняў. Польшча настойліва дамагаецца яго вызвалення, у тым ліку закрыўшы для гэтага памежны пераход «Баброўнікі».
