Иҫке Ҡаҙансыға - яңы һулыш
"Иң мөһиме – халыҡ ыңғай үҙгәрештәрҙе күрә. Был үтә мөһим".
15 декабрҙә Асҡын районына эш сәфәре барышында Башҡортостан Башлығы Радий Хәбиров Иҫке Ҡаҙансы ауылындағы табип амбулаторияһында булды. Уны былтыр “Һаулыҡ һаҡлау” милли проектына ярашлы төҙөгәндәр.
Асҡын үҙәк район дауаханаһы баш табибы Илдар Шакиров әйтеүенсә, амбулатория Иҫке Ҡаҙансыла йәшәгәндәрҙе генә түгел, эргә-тирәләге 14 ауыл халҡын да хеҙмәтләндерә – бөтәһе бергә 2300-ҙән ашыу кеше. Модулле бина тейешле медицина ҡорамалдары, мебель менән йыһазландырылған. Бында көндөҙгө стационар, процедуралар, прививка яһау кабинеттары бар. Пациенттарға барыу өсөн автомобиль дә бирелгән.
Амбулаторияла тәжрибәле белгестәр – табип-терапевт Айгөл Сабитова, фельдшер Ләйсән Ғәфүрйәнова, акушер Лилиә Ғайсина һәм процедура шәфҡәт туташы Зөбәржәт Ғайсина ҡабул итә. Медицина хеҙмәткәрҙәре махсус хәрби операцияла ҡатнашҡандарҙың ғаилә ағзаларына айырым иғтибар бүлә. “Һанлы ФАП” проекты ярҙамында ауыл халҡы ваҡытлыса эшкә яраҡһыҙлыҡ ҡағыҙы асыу, электрон рецепт яҙҙырып алыу, телемедицина консультацияһы үтеү кеүек һанлы медицина хеҙмәттәренән файҙалана.
Республика Башлығы табиптарҙың эш шарттары менән танышты, уларға хеҙмәте өсөн рәхмәт әйтте. Шулай уҡ ауыл халҡы менән аралашты. Улар хәҙер уңайлы шарттарҙа медицина ярҙамы алыуына һөйөнөүен белдерҙе.
– Республикала бер нисә йыл элек күп фельдшер-акушерлыҡ пункттары иҫке бинала урынлашҡан, мейес менән йылытыла ине. Ә хәҙер хәл үҙгәрҙе. Асҡын районында ФАП-тарҙы яңыртыу программаһы тормошҡа ашырыу тамамланды тиерлек, – тине Радий Хәбиров журналистар менән әңгәмәлә. – 2030 йылға ҡәҙәр беҙ һаулыҡ һаҡлауҙың беренсел звеноһында тәртип урынлаштырып бөтөргә тейешбеҙ. Эҙмә-эҙлекле, ныҡышмал эшебеҙ яҡшы һөҙөмтә бирә. Иң мөһиме – халыҡ ыңғай үҙгәрештәрҙе күрә. Был үтә мөһим.
Фотолар: республика Башлығы сайтынан.
Беҙҙең МАХ каналына ҡушылығыҙ: max.ru/gazetabash...
