Зариф Байғусҡаровтың эшмәкәрлеге лайыҡлы баһаланды
Был награда спорт ҡаҙаныштарын ғына түгел, депутаттың Башҡортостан һәм ил халҡы мәнфәғәтендә башҡарған күп яҡлы эшен дә таныу
Өфөлә, Башҡортостан Республикаһы Дәүләт Йыйылышы – Ҡоролтай йортонда, абруйлы “Еңеү Никаһы 2025” республика наградаһын тапшырыу тантанаһы үтте.
Дөйөм тауыш биреү һөҙөмтәһендә Рәсәй Дәүләт Думаһы депутаты, Башҡортостандың “Ирҙәр ҡоро” төбәк йәмәғәт ойошмаһы рәйесе Зариф Байғусҡаров “Дәүләт власы органдарының иң спортсы етәксеһе” номинацияһында еңеүгә лайыҡ булды.
Был рух көсөн, еңеүгә ынтылышын һәм әүҙем гражданлыҡ позицияһын сағыу кәүҙәләндергән кеше өсөн лайыҡлы награда. Зариф Закир улы шәхси өлгөһө менән күптәрҙе рухландыра: даими рәүештә марафонда йүгерә, саңғы уҙыштарында һәм ат сабыштарында ҡатнаша. Уның аталар улдары менән йүгереүҙе, традицион уҡтан атыу буйынса турнирҙарҙы һәм ғаиләләр өсөн ат турҙарын ойоштороу буйынса башланғыстары республикала спортты һәм традицияларҙы әүҙем популярлаштыра.
Ғөмүмән, йыл һайын республиканың төп спорт ваҡиғаларында ҡатнаша: “Йүгереү.РФ” Бөтә Рәсәй ярыммарафоны, Халыҡ-ара Өфө марафоны, Сибай һәм Октябрь ярыммарафондары, “Милләттәр кросы”, “Росхим йүгереүе” ярыммарафоны, “LOVERUN” йүгереүе, яңы йыл “Теләктәр йүгереүе”, Ҡуянтау-Баймаҡ йүгереүе, Талҡаҫ күле тирәләй йүгереү. Шулай уҡ саңғы уҙыштарында ҡатнаша. 10, 12,4 һәм 21,1 километр дистанцияларында шәхси һөҙөмтәләрҙе яҡшыртыу өҫтөндә даими эшләй. Һабантуйҙарҙа, “Башҡорт аты” фестивалендә һәм “Урал батыр” ҡышҡы уйындарында ат парадтарында, ат сабыштарында һәм милли ярыштарҙа (ашаҡ, ауҙарыш) даими ҡатнаша, башҡорт халҡының мәҙәни-спорт мираҫын популярлаштыра. Ул ғаиләһен - ҡатыны Гөлназ Фәрит ҡыҙын һәм улы Уралды спорт эшмәкәрлегенә йәлеп итә.
Шулай уҡ Өфөлә "Улдары менән атайҙар" конкурсын үткәрҙе. Аталар һәм улдар өсөн традицион уҡтан атыу буйынса йыл һайын турнир ойоштора. Спорт объекттарын (спорт стадиондары, балалар спорт мәктәбе, спорт залы, ябыҡ боҙ һырғалағы төҙөлөшө һәм башҡалар) төҙөү һәм реконструкциялау буйынса депутат контролен тормошҡа ашыра. Балалар спортына ярҙам итә: хоккей кейеме, боксер бирсәткәләре, футбол һәм волейбол туптары, спорт формаһы, инвентарь, саңғы, бильярд һәм теннис өҫтәлдәре, скалодром өсөн ҡорамалдар, коньки һәм башҡа бүләктәр тапшыра. Физкультура-һауыҡтырыу хеҙмәттәре өсөн НДФЛ-ды кире ҡайтарыу тураһында закон әҙерләүҙә ҡатнаша.
Башҡортостандың "Ирҙәр ҡоро" спорт-белем биреү проекттарын тормошҡа ашырыуға етәкселек итә. Республика ярыштарында даими рәүештә спортсыларға, тренерҙарға һәм ойоштороусыларға наградалар тапшыра, уларҙың хеҙмәтенең ижтимағи әһәмиәтен һыҙыҡ өҫтөнә ала.
Был награда спорт ҡаҙаныштарын ғына түгел, Зариф Байғусҡаровтың Башҡортостан һәм ил халҡы мәнфәғәтендә башҡарған күп яҡлы эшен дә таныу. Мәҫәлән, быйыл үҙ округындағы район һәм ҡалаларҙа 32 тапҡыр гражданды ҡабул итеү ойошторған, бөтәһе 636 кешене ҡабул иткән. Уларҙың күпселегенә ярҙам итә алған.
Зариф Закир улын хеҙмәтенең юғары һәм лайыҡлы баһаһы менән ихлас ҡотлайбыҙ! Бөтмәҫ-төкәнмәҫ көс-ҡеүәт, ныҡлы һаулыҡ һәм бөтә башланғыстарҙа ла яңы еңеүҙәр теләйбеҙ!
Фото: Гүзәл Бикмәтова.