#Munosabat.
Murojaatnomada yoshlar siyosati: kelajak sari qadam.
O‘zbekiston Respublikasi Prezidenti Shavkat Mirziyoyev 2025-yil 26-dekabr kuni Oliy Majlis va xalqimizga yo‘llagan Murojaatnomasida yoshlar masalasiga alohida e’tibor qaratilgani mamlakatimiz kelajagi yosh avlod bilan chambarchas bog‘liq ekanining yorqin ifodasidir. Murojaatnomada yoshlarni qo‘llab-quvvatlash, ularning bilim olishi, kasb-hunar egallashi, tadbirkorlikka jalb etilishi va ijtimoiy faolligini oshirish masalalari ustuvor vazifa sifatida belgilandi.
Mening fikrimcha, mazkur yondashuv yoshlarning o‘z salohiyatini to‘liq ro‘yobga chiqarishi uchun mustahkam zamin yaratadi. Ayniqsa, kasb tanlashi, zamonaviy bilim va texnologiyalarni o‘zlashtirish uchun yaratilayotgan sharoitlar yoshlarning raqobatbardosh kadrlar bo‘lib yetishishiga xizmat qiladi. Shu bilan birga, yoshlar orasida vatanparvarlik, mas’uliyat va fuqarolik pozitsiyasini mustahkamlashga qaratilgan tashabbuslar jamiyat taraqqiyotida muhim ahamiyat kasb etadi.
Prezident tomonidan ilgari surilgan g‘oya va vazifalar yoshlarni faqat qo‘llab-quvvatlash bilan cheklanmay, ularni mamlakat islohotlarining faol ishtirokchisiga aylantirishni ko‘zda tutadi. Bu esa yoshlarga katta mas’uliyat va ishonch yuklaydi.
Xulosa qilib aytganda, Murojaatnomada yoshlar masalasiga berilgan yuksak e’tibor menda katta ishonch va iftixor tuyg‘usini uyg‘otdi.
Biz va yoshlar yaratilayotgan imkoniyatlardan oqilona foydalanib, yurtimiz taraqqiyotiga munosib hissa qo‘shishimiz zarur, deb hisoblayman.
Asomiddin Xudayberdiyev,
Tibbiy-pedagogika va davolash fakulteti YoBIB dekan o‘rinbosari, Ijtimoiy fanlar, pedagogika va psixologiya kafedrasi dotsenti
