Яңы мөмкинлектәр асыла
Аппарат үҙәк һәм периферия нервы системаһына килтерелгән зарарҙан һуң ауырыуҙы тергеҙеү, әмәлиәттәрҙән һәм имгәнеүҙәрҙән ҡалған эҙемтәләрҙе бөтөрөү, артрит һәм артроздарҙы дауалау өсөн дә уңышлы ҡулланыла.
Өфө ҡалаһының Дим биҫтәһендәге дауаханаға,”Оҙайлы һәм әүҙем тормош” милли проектына ярашлы, “Орторент-кисть” тип аталған заманса хәрәкәт аппараты алынды. Ул юғары ослоҡ быуындарын роботлаштырылған механотерапия менән дауалау өсөн ҡулланыла.
Был юғары технологиялы комплекс неврологик һәм травматологик тайпылыштары булған пациенттарҙы реабилитациялауҙа яңы мөмкинлектәр аса. Ул ҡул суғын һәм бармаҡтарҙы әүҙем һәм пассив һауыҡтырыу өсөн тәғәйенләнгән. Был ғәмәл тергеҙеүгә ҡарашты тулыһынса үҙгәртә. Терапия инсульттан һуң һөҙөмтәле реабилитациялау өсөн файҙаланыла.Үҙәк һәм периферия нервы системаһына килтерелгән зарарҙан һуң ауырыуҙы тергеҙеү, әмәлиәттәрҙән һәм имгәнеүҙәрҙән ҡалған эҙемтәләрҙе бөтөрөү, артрит һәм артроздарҙы дауалау өсөн дә уңышлы ҡулланыла.
Аппарат ҡул суғына теүәл, билдәләнгән дозала тәьҫир итә. Пациенттар үҙҙәренең тырышлыҡ һөҙөмтәһен яҡшы күрә ала, ә был дауалау барышына мотивацияны һиҙелерлек арттыра.
"Оҙайлы һәм әүҙем тормош” милли проекты (нацпроект “Продолжительная и активная жизнь”) “Һаулыҡ һаҡлау” милли проектын һәм элекке ҙур ҡоласлы “Демография” проектының ҡайһы бер йүнәлештәрен артабан үҫтерәсәк. Тәү сиратта ярҙам сараларын ғүмер оҙайлығы илдәге уртаса күрһәткестән артта ҡалған төбәктәр һәм ауылдар аласаҡ. Милли проект һаулыҡ һаҡлауҙың тәүге звеноһын артабан яңыртыуға йүнәлтелгән, йөрәк-ҡан тамырҙары, онкология һәм диабет сирҙәре менән көрәш буйынса федераль программалар ҙа дауам итәсәк.
Тап ошо мөһим милли проект 2030 йылға көтөлгән ғүмер оҙайлығын 78 йәшкә (артабан 80 йәшкә) тиклем еткереүҙе күҙ уңында тота. Иҫегеҙгә төшөрәбеҙ, яңыртылған милли проекттар Рәсәй Президенты Владимир Путин ҡарары буйынса 2025 йылдың 1 ғинуарынан тормошҡа ашырыла.
Фото: Һаулыҡ һаҡлау министрлығының матбуғат хеҙмәте.
Беҙҙең МАХ каналына https://max.ru/gazetabashkortostan ҡушылығыҙ!