Меджународна дружина научников напърво експериментно подтвърдише, же вѫтрешно іѧдро Земли іествуіе в особому мѣшаному стоіаніу, меджу твърдым и текучим. Ово одкрытіе сотворили сѫ изъискатели од Сычуанскаго высшоучилища и Изучилища землехиміи Академіи наук Китаіа. Оно поіасніаіе стари землетрѧсни одклоненіа и може кліучно измѣнити наше разуменіе движеніа земных внѫтростей и образованіе магнитнаго поліа планеты.
На долго сѧ мыслиху, же вѫтрешно іѧдро Земли окружено текучим внѣшним іѧдром іе твърдым и гѫстым железным тѣлом. Іеднако глѧданіа показали сѫ, же то 3-5 процентно меніе гѫсто, неж чисто железо, что говори о присѫтности легчаішых елементов (наприклад, ѫглерод). Наіболіе, землетрѧсни волны, ктори проидѫт чрез іѧдро, имѫт быстрину 3.4-3.6 км/с, же іе много ниже неж предповѣданіе дліа железнаго іѧдра. Высокы коефиціент Пуассона іѧдра іе около гумы или твърдаго мазсла, что такоже говори о іеговоі пластичности.
Разгаданіем таіны, како говори изъисканіе в часопису National Science Review, іе сверх‐іонны состав железно‐ѫглеродных стопені, из кторых состоіи іѧдро (како сѧ мыслѧт). В тѧжкых условіах высокаго натиска и теплоты, кторы сѫ в срединѣ планеты, атомы (недѣлимы) ѫглерода достаіѫт необыкновену движимості, преходѧчи свободно както текутина вѫтрѣ сталоі кристаличноі мрежкы атомов железа. Іедночасно, железна мрежа-та оставаіе твърдоіѫ и порѧдноіѫ.
За да подтвърджѫт хипотезу-ту научницы сбудоваху особу монтажу дліа ударнаго натиска, ктора убыстрѧше кѫсцы железно‐ѫглеродных стопені до быстрины 7 км/с под натиском 140 ГПа при теплотѣ боліе 2600С, что іе близкым до условиі върхних слоіев вѫтрешнаго іѧдра. Мѣріеніе быстрины землетрѧсных волн заіедно с модерным молекуларно-динамичным моделираніем показаше наглы спад быстрины попречных волн и скок коефиціента Пуассона в творивѣ, кторо преидало до свърх‐іоннаго станіа.
Како казаше сотворец работы Іуі‐цзіуні Джан, в овому станіу атомы ѫглерода сѧ стаіѫт веліми рухливыми, проходѧчи чрез кристаличны состав железа, что понижаіе сталості стопеніа. Ово одкрытіе преводи модел вѫтрешнаго іѧдра од статичнаго и сталаго до динамичнаго. Свърх-іонно станіе поіасніаіе необыкновени землетрѧсни своіствы, такоже и повышаіе разуменіе вѫтрешноі динамикы, наприклад, пробѣг твореніа магнитнаго поліа Земли. Свободно движеніе легкых елементов в іѧдру іе механизм, ктор не быше уважен раніе както извор енергіи дліа землединамикы, же твори планетарно магнитно поліе. Даны такоже хте помогѫт поразумити развоі магнитных полеі иных камѧных планет, наприклад Марса.
Мрежна версіа: Кирилица / Latinica