Икенсе "Йәш шайморатовсылар балы" үтте
Республиканың 23 районындағы һәм биш ҡалаһындағы 34 Шайморатов кластарынан 200 бала ҡатнашты.
Өфөлә икенсе тапҡыр "Йәш шайморатовсылар балы" үткәрелде. Республиканың 28 муниципалитетындағы Шайморатов кластарынан 218 бала ҡатнашты. Улар - уҡыуҙа яҡшы һөҙөмтәләр күрһәткән, олимпиадаларҙа, ижади һәм фәнни конкурстарҙа, хәрби-спорт ярыштарында призлы урындар яулаған, йәмәғәт ойошмалары һәм ирекмәндәр хәрәкәттәре эшмәкәрлегендә әүҙем ҡатнашҡан уҡыусылар.
– Генерал Шайморатов яҙмышы ғәжәпләндергес. Һәм Башҡортостан, республикабыҙ өсөн ғорурлана һәм уларға тиңләшеп ҡарарлыҡ геройҙар булыуы – ҙур бәхет. Тап ошондай маҡсатта йәш шайморатовсылар кластарын ойошторҙоҡ. Улар хәрби тарихын өйрәнергә теләгән балаларҙы берләштерә, республикабыҙҙың, ҙур илебеҙҙең ысын илһөйәре булырға теләй. Йәш шайморатовсы булыу – ҙур яуаплылыҡ. Уның исеме тормошоғоҙ буйлап барасаҡ, - тине Радий Фәрит улы. – Яҡшы уҡырға, яңы белем алырға ынтылырға, спорт яратырға, өҫтәмә белем алырға һәм, әлбиттә, илһөйәр булырға кәрәк. Был көн һеҙҙең хәтерҙә, ата-әсәләрегеҙ, уҡытыусыларығыҙ хәтерендә, ҡалыр, тип ышанам. Барығыҙға уңыштар, тыныслыҡ, именлек һәм Башҡортостандың сәскә атыуын теләйем.
Республикабыҙ Башлығы 11 уҡыусыға “Йәш шайморатовсы” почетлы билдәһен тапшырҙы. Йәш шайморатовсылар балда композитор Урал Иҙелбаевтың көйөнә башҡорт вальсын һәм Рим Хәсәновтың билдәле “Ҡышҡы романс” көйөнә вальс-лендлер, тағы полонез бейене.
Ватан геройҙары көнөндә матур сараға Ауырғазы районының Мораҙым мәктәбе директорының тәрбиә буйынса кәңәшсеһе Рушания Ҡудашева шайморатовсылар Софья Иҫәнғолова, Дим Хәбибуллин, Гөлнара Хәбибуллина һәм Абдрахман Яҡшин менән килгәйне. “Беҙҙе бында ҡатнашырға тип саҡырғастар, тиҙ генә риза булдыҡ. Балалар өс йыл элек Шайморатовсылар рәтенә алынғайны. Улар шайморатовсыларҙың төбәк ярыштарында ҡатнашты, яҡшы һөҙөмтәләргә өлгәште. Абдрахман Яҡшин көрәш менән даими шөғөлләнә, уңыштары бар”, - тине Рушания Ҡудашева.
Дыуан районының Мәсәғүт гимназияһынан Ольга Вилданова өс ҡыҙ һәм өс егет - Карина Носратуллина, Нонна Шишкина, Регина Яруллина, Камил Вәлиев, Елесей Забобурин һәм Максим Гуркин менән килгәйне. “Балда ҡатнашҡан балаларыбыҙҙың һәр береһе ниндәйҙер ҡаҙанышҡа өлгәшкән. Улар Бөтә Рәсәй уҡыусылар олимпиадаһының төплө этаптарында уңыштар яулаған. Мәҫәлән, Карина – Дыуан районы балалар хоҡуҡтары буйынса вәкиленең балалар хәрәкәте вәкиле”, - тип һөйләне Ольга Вилданова.
Күгәрсен районының Башҡортостандың Беренсе Президенты Мортаза Рәхимов исемендәге Башҡорт гимназияһынан Зәлиә Ҡотлоғилдина, Фәриҙә Сәлихова, Дина Йәлмәмбәтова, Радмил Ғөбәйҙуллин, Иҙел Исҡужин, Батыр Һунарсин класс етәкселәре Элиза Сатыева менән беренсе тапҡыр ҡатнашыуы һәм күңелдәрендә яҡты тойғолар ҡалдырыуы тураһында әйтте. Өфө районының Шамонин урта мәктәбенең 9 “б” класы уҡыусылары – Камилла Зәйнетдинова, Айгүзәл Миңлейәрова, Ынйы Шөғөрова, Алһыу Дәүлшәтшина, Малик Миңлейәров, Әмерхан Вилданов, Бәхтейәр Иштанов һәм Камил Йәнтурин шайморатовсылар ҙа уҡыуҙа төрлө ҡаҙаныштарға өлгәшкән, төрлө олимпиадаларҙа даими ҡатнаша, үҙҙәрен спортта һынай, бейеү менән шлөғөлләнә. Улар был матур сараға класс етәкселәре Дилә Ринат ҡыҙы Миңлейәрова менән килгәйне.
Әйткәндәй, "Шайморатов" кластарын тәүге тапҡыр 2020 йылдың көҙөндә Өфөләге 44-се һәм 162-се полилингваль күп профилле мәктәптәрҙә, шулай уҡ Р. Ғарипов исемендәге Башҡорт республика гимназияһында булдырҙылар. Артабан ошо тәжрибә бөтә республикаға таралды.
Автор фотолары.
Беҙҙең МАХ каналына https://max.ru/gazetabashkortostan ҡушылығыҙ!
