Был ҡалала бер генә өй: бөтә халыҡ 14 ҡатлы йортта йәшәй

Уиттиер — донъялағы иң ғәҙәти булмаған ҡала. Бер яҡтан уны тауҙар уратҡан, икенсе яҡтан — океан. Был тар ғына урында бөтә халыҡ бер бинала йәшәй. Ҡала тураһында күптәр яңыраҡ шунда йәшәгән ҡыҙҙың TikTok-та һалған видеояҙмаһынан белеп ҡала. Был бәләкәй ҡала Америка Ҡушма Штаттарының Аляска штатында урынлашҡан. Уның халҡы ни бары 300 тирәһе кеше тәшкил итә. Джанесса исемле ҡыҙ ошо берҙән-бер йортта йәшәй һәм тап ул видеоһын баҫтырып сығарған. Ҡыҙ бында йыл әйләнәһенә 196 фатирҙа 318 кеше йәшәүен һөйләй. Был берҙән-бер бинала барыһы ла бар: почта, сиркәү, магазин һәм төҙөлөш офисы. Шулай уҡ урам аша урынлашҡан мәктәпкә алып барыусы туннель. Элек унда хатта поликлиника ла булған. Шулай ҙа ҡалала табип һәм дежур "ашығыс ярҙам" хеҙмәте эшләй. Бөтә ауыр пациенттарҙы яҡындағы Анкоридж ҡалаһына алып китәләр. Бынан тыш, дүрт километр оҙонлоғондағы туннель бар, ул ҡаланы башҡа донъя менән тоташтыра. Әгәр ул булмаһа, цивилизацияға кәмә, самолет йәки поезда ғына барып етергә мөмкин булыр ине. Ҡалала тағы бер ҙур бина, ташландыҡ күп фатирлы йорт бар. Хәҙер ул буш тора. Бынан тыш, эш офистары, ҡунаҡхана, ресторан, гавань, паром терминалы һәм балыҡ эшкәртеү заводы бар. Башта был ҡала АҠШ армияһының хәрби базаһы булараҡ күҙаллана. Әммә көслө ер тетрәү һөҙөмтәһендә цунами барлыҡҡа килә. Гигант тулҡындар 13 метр бейеклеккә етә. Ҡаласыҡ бик ныҡ зыян күрә. Базаны икенсе урынға күсерәләр. Ябай кешеләр иһә был урынға шул тиклем күнеккән һәм уны ташлап китергә теләмәгән. Ваҡыт үтеү менән тораҡ ҡала тип атала башлай. Джанесса аңлатҡанса, бөтә кешенең дә бер бинала йәшәүенең сәбәбе бар: бер кем дә унда йорт төҙөү өсөн ер участкаһы һатып ала алмай. Округтағы бөтә ерҙәр тимер юл ҡарамағында, буш ятҡаны юҡ. Бындағы мәшғүллек миҙгелле, шуға күрә ҡыш ҡала ябыҡ, әммә йәй эш була. Бынан тыш, кешеләрҙе ҡала властары, мәктәп, тимер юл компанияһы, туннель компанияһы һәм башҡа ведомстволар яллай ала. Уиттиер Алясканың бик мөһим порты ла булып тора. Урындағы боғаҙ тәрән һыулы булғанлыҡтан, бында хатта иң ҙур круиз лайнерҙары ла еңел инә. Ҡалаға меңәрләгән турист килә. Тик ғәҙәти булмаған урынға барырға теләүселәр йылыраҡ кейенергә тейеш. Бында уртаса тәүлек температураһы йәйгеһен 13°С тирәһе, шулай уҡ һауа торошо бик ямғырлы. Фото: нейроселтәр. Беҙҙең МАХ каналына https://max.ru/gazetabashkortostan ҡушылығыҙ!