Балтач районының Түбән Карыш, Анновка, Яңа Тормыш авыллары тарихын чагылдырган шундый исемдәге өр-яңа китап дөнья күрде.
Китап... Авыл тарихы. Шушы өч сүзнең мәгънәсен яшәү дәверендә аңлап бетереп буламы икән? Алдымда әле генә дөнья күргән, буяу исе дә кипмәгән өр-яңа авылым тарихы китабы “Карышның ике ярында”. Авторы киң билгеле шәхес, шагыйрә, язучы Гөлнара Шәймөхәмәтова (Гөл Мирһади), шулай ук идея, яки шушы китапны булдыруга орлык салган Анновка авылында туып-үскән, әлеге көндә Мәскәү шәһәрендә яшәүче Фидан Шәрипов.
Менә шушы ике авылдаш эшче төрем туплап (22 кеше) бик тә зур эшкә тотындылар. Авылга килеп халык белән җыелып сөйләшкәннән соң, һәркемгә кайсы юнәлештә материаллар тупларга, үз гаилә тарихларын, күршеләре (күбесе олылар), читтә яшәүчеләргә хәбәр җибәреп (хәзер телефон булгач) материаллар җыю башланды. Халыктан “Эшнең өстеннән очып булмый” дигән әйтем бар. Әнә шулай вакыт үтә бара һәм менә ел ярым үтүгә китап әзер. Тормыш булгач, тиз генә булмый шул, автор сәбәпләрен бу турыда үзе яза.
Шунысы куанычлы, китап Түбән Карыш, Анновка, Яңа Тормыш авылларының, анда туган, яшәгән кешеләрнең үз хатирәләрен, нәсел, гаилә альбомыннан фотосурәтләр, иҗади җимешләре кертелә. Бу авылларда булган колхоз, оешмаларның тарихлары башлыча XX-XXI гасырга караган вакыйгалар тарихын үз эченә ала. Автор “сүз азагы”нда язган мөрәҗәгатендә нәкъ китапның барлыкка килүен тасвирлый.
Әйе, авылдашлар безнең авылларның да, һәркемнең үз сүзләре белән язылган тарихы барлыкка килде, бәлки еллар үткәч тагын да өстәлер, әмма бүгенгесе беренчесе — юл яручы булып калачак.
Һәркемнең үз фикере була, шуңа да безгә дә тәнкыйть утын яудыручылар булыр, бар яктан да камиллеккә ирешү бу дөньяда мөмкин түгел.
Кулымдагы китапны укый башлауга, бала вакыттан алып хәзерге көнгә кадәрге вакыйгалар күз алдыннан үтә. Әмма, бүген без алдагы буыннарга — балалар, оныкларны, шушы материаллар белән таныштырып, аларның уй-фикерләренә, йөрәкләренә үтеп кереп тәрбияли алсак — безнең киләчәк якты булачак, китап һәр гаиләнең өстәлендә булсын иде, тарихны онытырга ярамый. Тарихын белмәгән халыкның киләчәге юк.
Шушы мәкаләм аша мин авылдашларым — китапның авторы Гөлнара Шәймөхәмәтовага, идея авторы Фидан Шәриповка, эшче төркемгә, Анновка авылы кияве, район гәзите редакторы, танылган фотограф Рөстәм Вәлиевка, фотограф Алсуга, авылдашларга чиксез рәхмәтемне җиткерәм. Барыбыз да тырыштык. Тырышлыкта, бердәмлектә көч һәм җиңү. Минем фикерем шулай. Сәламәтлек теләп: Гыйззәт СУФИЯРОВ, Түбән Карыш авылы, хезмәт ветераны, Түбән Карыш авыл советының ветераннар советы рәисе.