ԱՄՆ նախագահ Դոնալդ Թրամփը հայտարարել է, որ շարունակում է ջանքեր գործադրել ուկրաինական հակամարտության կարգավորման համար և կարծում է, որ կարող է դրան հասնել, հաղորդում է «Ինտերֆաքս»-ը:
«Մենք այդ ուղղությամբ շատ լարված ենք աշխատում և պետք է կանգնեցնենք այն»,- ասել է նա Սպիտակ տան մոտ Սուրբծննդյան եղևնու լույսերը վառելու արարողության ժամանակ:
Նախագահը հայտարարել է, որ ներկայումս իր երկիրն անվտանգ է, և բնակչությունը կարող է հանգիստ նշել Սուրբ Ծնունդն ու Նոր տարին:
«Որպես ազգ՝ մենք կարող ենք շատ բաների համար շնորհակալ լինել»,- ասել է ամերիկացի առաջնորդը։
Մոսկվայում դեկտեմբերի 2-ին կայացել էր ՌԴ նախագահ Վլադիմիր Պուտինի հանդիպումն ԱՄՆ նախագահի հատուկ բանագնաց Սթիվ Ուիթկոֆի և Թրամփի փեսայի՝ Ջարեդ Քուշների հետ: Թրամփը հանդիպման մասին խոսելիս ասել էր, որ Մոսկվայում ամերիկյան պատվիրակության բանակցություններն ուկրաինական կարգավորման շուրջ լավ են անցել:
Նորություններին հետևեք մեր կայքում, ինչպես նաև Telegram-ում և YouTube-ում