🐺 У Лідскім раёне застрэлілі чорнага воўка
У Лідскім паляўнічым гаспадарстве быў адстрэлены рэдкі чорны воўк. Пра гэта паведаміла Беларускае таварыства паляўнічых і рыбаловаў (БООР), якое ўзначальвае былы міністр унутраных спраў Ігар Шуневіч.
@BGazeta паразмаўляла з экалагіняй Інэсай Балоцінай пра асаблівасці чорнага воўка і магчымыя наступствы адстрэлу ваўкоў у Беларусі для навакольнага асяроддзя. Як адзначае спецыялістка, чорны воўк належыць да таго ж віду, што і воўк шэрага колеру — Canis lupus. Чорная афарбоўка поўсці з’яўляецца вынікам мутацыі — меланізму, які раней назіраўся ў хатніх сабак і, імаверна, перадаўся ваўкам праз гібрыдызацыю.
Паводле слоў Інэсы Балоцінай, адрозненні паміж чорнымі і шэрымі ваўкамі могуць датычыцца не толькі колеру поўсці. Існуюць даследаванні і назіранні, згодна з якімі жывёлы з нетыповай, у тым ліку больш цёмнай або стракатай афарбоўкай, часам маюць больш мяккія паводзіны ў параўнанні з асобінамі з класічным выглядам.
«Адрозненні ў паводзінах у межах аднаго віду часам сапраўды звязаныя з пэўнымі мутацыямі. І сітуацыя з чорнымі ваўкамі — не выключэнне»
— адзначае экалагіня. Пры гэтым яна падкрэслівае, што ў Беларусі спецыяльныя даследаванні, прысвечаныя такім адрозненням, не праводзіліся.
У Беларусі адстрэл ваўкоў дазволены цягам усяго года незалежна ад іх афарбоўкі, бо воўк лічыцца драпежнікам, які палюе на капытных жывёл. Аднак эколагі нагадваюць, што ваўкі адыгрываюць важную ролю ў экасістэме, рэгулюючы колькасць капытных, папуляцыя якіх у апошнія гады істотна павялічылася.
