Буряадай эмшэнэр 25 наһа хүрөөгүй залуугаар эжы болохын һайниие ойлгуулаа

Жэрмэһэн ябаха үе эхэнэр бүхэндэ эгээл шухала, онсо үе болоно. Энэ үедэ эхэнэр хүнэй бэе ондоо болоно, сэдьхэл һанаанииншье баһал өөршэлэгдэнэ Буряад Уласай перинатальна түбэй сэдьхэл зүйн эмшэ Ирина Доржиевагай һанамжаар, эхэнэрнүүдэй түрүүшын үхибүү түрэхэдэ һайн наһан 25 жэл болоно. Энэ тобшолол хадаа олон жэлэй мэргэжэлтэ туршалгын дүн болоно юм. Жэрмэһэн байха үе хадаа эхэнэр зондо ехэ бодото бэеын хубилалтануудаар олон байна юм. Бүхы эхэнэрнүүд олон юумэндэ һанаагаа зободог. Залуу эхэнүүдэй һанаа зобохо, эргэлзэхэ, айха асуудалнуудаар, үхибүүнэй урда харюусалганууд тухай сэдьхэл зүйн мэргэжэлтэд туһа хүргэдэг. Жэрмэһэн ябаха үеын шатануудта перинатальна түб соо сэдьхэл зүйн мэргэжэлтын туһаламжа ходо ябуулагдана. Залуу эхэнэрнүүдээр хөөрэлдэдэг, һанаа зоболтын заһабарилга, хүндээр хээлитэй боложо байһан зонтой ажал ябуулга, үхибүүгээ алдаһан эхэнүүдтэй болон түрэһэн хойнонь туһалха арганууд бии юм. Теэд Ирина Доржиевагай һанамжаар 25 наһа хүрөөгүй түрэхэдэ һайн болоно. - Хорин таба наһа хүрөөгүй эхэнэрэй сэдьхэл һанаанииньшье шанга, шэнэ эрилтэнүүдтэ түргэн һурана, хүндэ байдал һайнаар дабажа гарана юм. Тиихэдэ залуу бэень хадаа хурдан шэнэ байдалда һурана. Энэ үедэ ажамидаралайнь хүндэ байдалнууд ехэ тааралдаагүй байна. Тиимэһээ түрэһэн үеын хойно депресситэйшье тааралдахань хомор байха, - гэжэ Ирина Александровна тайлбарилна. Түрэһэнэй хойно эхэнэртэ ехэ хандабритай байха хэрэгтэй. Энэ үедэ эхэнэр зон хэбрэг болоно. Эндэ хадаа гормональна хубилалтанууд, үхибүүнэй бии болоһон үе, сээжээр хоололго. - Минии туршалга соо хадаа харахада 35 наһанай хойно түрэһэн эхэнэрнүүдэй дунда депресси гэжэ эбэшэн ехээр хүгжэнэ. 25 наһа хүрөөгүй эхэнэрнүүдэй дунда тиимэ байдал бэшэ, - гэжэ Ирина Александровна тэмдэглэнэ. - Энээндэ хадаа ниигэмэй шата, наһан, түрүүшынхи жэрмэһэн ябаһан үениинь, түрэһэн үень, хээлитэй ябаһанайнь хугасаа эдэ бүхэн нүлөө үгэнэ. Эмшэнэрнүүдэй хэлэһээр, бүхы дэлхэй дээрэ буруу һанамжа байна - нэн түрүүн ажал хүдэлмэри, салин мүнгэ, хэрэглэгдэхэ зүйлэнүүдтэй болоод, һүүлээрнь үхибүү түрэхэ гэжэ. Үнэн дээрээ хээлитэй ябаха үе, үхибүү түрэхэ саг эхэнэрэй хүгжэлтэдэ, ажалда нэгэшье һаата болоногүй. Ажамидаралыень бүри удхатай, гүнзэгы болгоно юм.