"Яугирҙәребеҙ беҙгә тылда ла бик кәрәк!"

Стәрлетамаҡтағы “Әсә һәм бала” коммерцияға ҡарамаған хәйриә фонды етәксеһе Тимур Ҡунаҡҡужин, махсус хәрби операция башланғас, медицина учреждениеһында МХО-ла ҡатнашыусылар, уларҙың ғаилә ағзалары өсөн түләүһеҙ реабилитация үҙәге ойошторорға ҡарар итә. Һөҙөмтәлә “Йөрәк ҡушыуы буйынса” тип аталған ирекмәнлек проекты төҙөлә. Уны хәйриә фонды етәкселәре үҙ иҫәбенә тормошҡа ашыра башлай. Үҙәккә тәжрибәле, юғары квалификациялы белгестәр туплана, реабилитация өсөн кәрәкле тренажерҙар, медицина ҡорамалдары алына. “Йөрәк ҡушыуы буйынса” ирекмәнлек проекты Башҡортостан Башлығы грантына конкурста ҡатнашып, “Ғаиләне, әсәлекте, атайлыҡты һәм балалыҡты яҡлау” йүнәлеше буйынса еңеү яулай. Һөҙөмтәлә республикала тиңе булмаған заманса аппараттар алыу мөмкинлеге тыуа. Хәҙер инде үҙәктә 200-ҙән ашыу яугирҙе аяҡҡа баҫтырғандар. — Мин үҙем — реабилитолог. Заман шарттары, һөнәр, йөрәк ҡушыуы буйынса, медициналағы башҡа йүнәлештәрҙе лә өҙлөкһөҙ өйрәнергә, уҡырға, квалификацияны камиллаштырыу курстарын үтергә тырышам. Мин генә түгел, бар коллектив шулай белемен даими камиллаштыра, – ти Тимур Ҡунаҡҡужин. Үҙәккә МХО-ла алғы һыҙыҡтан йәрәхәтләнеп ҡайтҡандар ҙа, ветерандар ҙа, ялдағылар ҙа мөрәжәғәт итә. Эш ял, байрам көндәрендә лә туҡтамай. Яугирҙәрҙең күбеһе дауаланып, яңынан махсус хәрби операция биләмәһенә юлланған. Мәҫәлән, “Фатыч” позывнойлы яугир — һуңғы утыҙ йылдағы барлыҡ локаль бәрелештәрҙе үткән, 2022 йылдан Салауат Юлаев исемендәге доброволецтар батальоны сафында хеҙмәт иткән яугир, хәрби хәрәкәттәр ветераны. Әле уның улы ла МХО-ла. “Фатыч” был үҙәктә өс ай дауамында байтаҡ аппараттың көсөн үҙендә һынаған. Аяҡ-ҡулдар өсөн “Ормед мото”, умыртҡа һөйәгенә механотерапия үткәреүгә тәғәйенләнгән “Ормед-кинезо” ҡорамалдары, барокамера, “АкваРелакс” аппаратында бәйләнешһеҙ гидромассаж, флоатинг тәьҫирле массаж капсулаһы һәм башҡалар барыһы ла яугирҙәргә йәшәү көсө өҫтәй. — Бына Марсель иһә — 3-сө спецназ бригадаһы яугире. Луганск өлкәһендәге Кременная ҡалаһы янында яраланған. Тубығын дауалаясаҡбыҙ, — тип пациенттары менән таныштырҙы Тимур Ғаяз улы. — Ә Сережа МХО-ға өлөшләтә мобилизация буйынса алынған. Алышта ҡаты яраланған, тубыҡ һөйәге бөтөнләй юҡ. Шулай ҙа травматолог аяғын ҡырҡмаҫҡа ҡарар иткән, протез ҡуйғандар. Барыбер атлай алмаҫмын, ти ине Сережа, хәҙер реабилитацияның аныҡ һөҙөмтәһен күргәс, ныҡлап шәбәйеү теләге көсәйҙе. Массаж аппаратындағы егет — Эске эштәр министрлығының ғәмәлдәге хеҙмәткәре Николай. 2022 йылдан башҡорт батальоны составында алышҡан. Яраланып, Дондағы Ростов госпиталендә байтаҡ ваҡыт дауаланған. Әле беҙҙә һауығыу курсы үтә. Беҙҙә физик реабилитация ла, психологик, рухи ярҙам да алып барыла. Үҙәккә аҙна һайын мосолман һәм христиан дини ойошмалары етәкселәрен саҡырабыҙ, улар егеттәр менән ихлас аралаша, барлыҡ һорауҙарына яуап бирә. Комплекслы дауаланыу үткән пациенттарыбыҙҙың күбеһе махсус хәрби операцияға кире китте. Барыһы менән дә һөйләшеп, хәлдәрен белешеп торабыҙ, бәйләнеште өҙмәйбеҙ. Хәрби бурысын лайыҡлы үтәгән яугирҙәребеҙгә бар яҡлап ярҙам итергә тейешбеҙ. Уларҙың граждандар тормошона тиҙерәк өйрәнеүенә, социалләшеүенә әүҙем булышлыҡ итәйек. Яугирҙәребеҙ беҙгә бында ла бик кәрәк! Айрат Нурмөхәмәтов фотолары.