Һәр кемдең фекере мөһим

Башҡортостан Башлығы Радий Хәбиров Республика Йортонда "Инвестиция сәғәте"н өҙлөкһөҙ уҙғара. Унда кемдәр генә саҡырылмай, аяғында ныҡлы баҫып торған йүнсел фермерҙарҙан алып бөгөн эштәрен әле саҡ башлап торған ныҡышмал фермерҙарға хәтлем барыһы ла үҙҙәренең фекерен асыҡтан-асыҡ еткерә. Әйткәндәй, ултырышта һәр кемгә һүҙ бирелә, бында һәр кемдең фекере бик тә мөһим. – Беҙ асыҡтан-асыҡ аралашыуға һәр ваҡыт әҙер, шуның өсөн йыйылғанбыҙ ҙа инде, – тип белдерҙе Радий Хәбиров. – Бөтә күрһәткестәр ҙә төбәк иҡтисадының үҫеш динамикаһын туранан-тура сағылдыра. Мәҫәлән, бизнестың эшмәкәрлеге шул хәтлем яҡшы ойошторолған, сәмселдәр халыҡҡа кәрәкле тауар етештерә, кешеләргә төрлө йүнәлештә хеҙмәттәр күрһәтелә. Әйтәйек, күптән түгел Өфө районында тормошҡа ашырыласаҡ ҡайһы бер проекттар тикшерелде. Башҡортостанда Логистик паркын төҙөү – шуға асыҡ миҫал. Проект нигеҙендә "А" класына ҡараған универсал келәттәр селтәре ҡалҡытыласаҡ, үҙ сиратында, унда етештереү объекттары урынлашасаҡ. Беренсенән, өр-яңы эш урындары асыласаҡ, икенсенән, был районға логистик ҡыҙыҡһыныу артасаҡ, өсөнсөнән, тауарҙы һаҡлау һәм бүлеү күпкә еңелләшәсәк. Тағы ла бер проект тураһында бер кәлимә һүҙ. Өфө районында һуғарыу системаһының төҙөлөүе күҙ уңынлда тотола, артабан иһә люцернаны киптереү тураһында ла уйлана эшҡыуар. Ғөмүмән, әгәр ҙә ошо ике проект тормошҡа ашырылһа, ул райондың үҫешенә тос йоғонто яһаясаҡ. Башҡортостан Башлығы Радий Хәбиров һөйләүенсә, эшләргә атлығып торған эшһөйәрҙәрҙе улар ярҙамдан өҙмәйәсәк. Әлбиттә, был мәсьәлә - өҫтөнлөклө йүнәлештәрҙең береһе, бизнестың өр-яңы битен асыусыларға ла, эшҡыуарлыҡ тигән юлдан эре аҙымдар менән атлаусыларға ла, проект йәки идея менән яныусыларға ла хуплау һүҙҙәре генә еткерелә. – "Инвестиция сәғәте" – үҙ сиратында, бизнес менән власть араһына һалынған ышаныслы күпер, – тине Радий Фәрит улы йөҙөнсө юбилей кәңәшмәһендә. – Эшҡыуарҙар менән ныҡлы бәйләнеш ептәре булдырыусыларҙың барыһына ла рәхмәтлемен. Был – ифрат ҡатмарлы һәм ауыр эш, әммә төбәк иҡтисадын юғары күтәреүҙә уның емештәрен күреү, граждандарҙың тормошон еңеләйтеүгә булышлыҡ итеү шул хәтлем ҡыуаныслы. Киңәйтелгән ултырыштарҙа эшҡыуарҙар, төрлө аңлашылмаған бюрократ кәртәләрен урап үтеп, Радий Хәбировҡа туранан-тура үтенесен белдереү мөмкинлегенә эйә. Инвестиция сәғәттәренең власть менән бизнес өсөн уңайлы диалог ролен үтәүен дә онотмайыҡ. Үҙ сиратында, ул төбәккә капитал һалыуға ҙур ҡыҙыҡһыныу уята, артабан инде өр-яңы эш урындарына юлдар асыла. Эшһеҙлек күҙгә күренеп кәмей һәм социаль-иҡтисади хәл шаҡтай яҡшыра. Бындағы кәңәшмәнән һуң инвестиция проекттарын ҡарауҙың ваҡыты ҡыҫҡара, дәүләт ярҙамы арта. Бары тик шундай эш алымы айҡанлы, республикабыҙ, инвестиция мөхите исемлегенең уртаһында торғандан һуң, хәҙер иһә Стратегик башланғыстар агентлығы рейтингында лидер ролен үтәй. Фото: Өфө районы хакимиәте сайтынан. Башҡортостан Хөкүмәте Премьер-министрының беренсе урынбаҫары, иҡтисади үҫеш һәм инвестиция сәйәсәте министры Рөстәм Моратов: – Башҡортостан Башлығы Радий Хәбировтың башланғысы менән уҙғарылған инвестиция сәғәттәрен илебеҙҙең бүтән яҡтарында ла яҡшы беләләр. Радий Фәрит улының бизнес тураһында эшлекле тәҡдимдәрен еткереүе, эшҡыуарҙарҙы ентекле тыңлауы, йүнселдәрҙең кәңәштәренә ҡолаҡ һалыуы бөтә яҡлап та отошло. Ковид пандемияһын үткәрҙек, санкцияларҙы күреп-белеп торабыҙ, уның ҡарауы, республика етәкселегенең иҡтисадтың тотороҡлолоғон тәьмин итеү йәһәтенән, тармаҡҡа йән өрөү буйынса эш тәжрибәһе етерлек. Төп бурыстарҙың береһе – халыҡтың йәшәйешендә еңеллек һәм уңайлыҡтар тыуҙырыу, кешеләргә яңы эш урындары булдырыу, уңғандарға ярҙам күрһәтеү, инвесторҙар менән үҙ-ара аңлашып хеҙмәттәшлек итеү.