Башҡортостан Яңы йылға әҙерләнә

Бөгөн Хөкүмәттең аҙналыҡ кәңәшмәһендә республика ҡалаларында һәм райондарында яңы йыл сараларына әҙерлекте тикшерҙеләр. Башҡортостандың торлаҡ-коммуналь хужалыҡ министры Ирина Голованова хәбәр итеүенсә, муниципалитеттарҙа бөтәһе 670 яңы йыл ҡаласығы йыһазландырыласаҡ, 1 855 шыршы һәм 2 меңдән ашыу арт-объект ҡуйыласаҡ. Өфөлә 71 шыршы һәм 21 яңы йыл ҡаласығы төҙөләсәк. – 5 декабргә тиклем тораҡ пункттарҙа биналарҙы, инеү төркөмдәрен, урамдарҙы һәм йәмәғәт киңлектәрен, парктарҙы һәм скверҙарҙы архитектура яҡтыртыуын монтажы тамамланасаҡ, – тине Ирина Голованова. – Ә 22 декабргә яңы йыл ҡаласыҡтарын тантаналы асыуға әҙерләргә кәрәк. Башҡортостан Башлығы Дәүләт техник күҙәтеүенә ҡышҡы тауҙарға техник баһа бирергә, ә муниципалитет башлыҡтарына – яңы йыл байрамдарында йәмәғәт тәртибен һаҡлау мәсьәләләренә ҙур иғтибар бүлергә ҡушты. Мәҙәниәт министры Әминә Шафиҡова хәбәр итеүенсә, яңы йыл каникулдары осоронда республика халҡы өсөн 28 мең күмәк сара ойошторола. Ваҡиғалар тураһында мәғлүмәтте традицион рәүештә “Яңы йыл календары”нда белергә мөмкин. Уны “Башҡортостандың мәҙәни донъяһы” интернет-порталында урынлаштыралар. Махсус хәрби операцияла ҡатнашыусыларҙың ғаиләләренә, һаулыҡ мөмкинлектәре сикләнгән балаларға һәм етем балаларға айырыуса ҙур иғтибар бүлергә планлаштыралар. Улар театрлаштырылған тамашаларға бушлай йөрөй ала. Бының өсөн 17 мең саҡырыу билеты әҙерләнгән. – Яңы йыл байрамдарына шулай уҡ Хәйбулла районының Һамар һәм Подольск ауылдарында, Мәсетле районының Яңы Мөслим ауылында, Ишембай районының Яңы Сәйет ауылында модулле клубтар, шулай уҡ “Ғаилә” милли проекты сиктәрендә ремонтланған 11 мәҙәни-ял итеү учреждениеһын асырға ниәтләйбеҙ, – тине Әминә Шафиҡова. Башҡортостандың мәғариф министры Илдар Мәүлетбирҙин хәбәр итеүенсә, 25 декабрҙә “Башҡортостан” дәүләт концерт залында 1 100 уҡыусы өсөн Республика Яңы йыл шыршыһы була. Ә 22-29 декабрҙә яңы йыл иртәлектәре республиканың белем биреү учреждениеларында үтәсәк. Ҡышҡы каникулдар осоронда ҡалаларҙа һәм райондарҙа “Яңы йыл ғаилә уйындары” ойошторола. Бынан тыш, министрлыҡта уҡыусылар өсөн байрам ваҡиғалары календары әҙерләнгән. Ул конкурстарҙы, викториналарҙы, күргәҙмәләрҙе, флешмобтарҙы, интерактив яңы йыл тамашаларын, квестарҙы үҙ эсенә ала. Башҡортостандың ғаилә, хеҙмәт һәм халыҡты социаль яҡлау министры Ленара Иванова хәбәр итеүенсә, яңы йылға бүләктәрҙе күп балалы, тәрбиәгә алынған һәм опекун ғаиләләрҙән балалар, шулай уҡ республиканың ғаилә тәрбиәһенә булышлыҡ итеү Үҙәктәре һәм социаль приюттар тәрбиәләнеүселәре аласаҡ. Ололар һәм инвалидтар өсөн интернаттарҙа ирекмәндәр ҡатнашлығында тантаналар үтәсәк. Байрам сараларын Донбасс һәм Сүриә Ғәрәп Республикаһы биләмәләренән килгәндәрҙе ваҡытлыса урынлаштырыу пункттарында ла ойошторалар. Министр шулай уҡ 2026 йылдың 13 ғинуарында Башҡорт дәүләт опера һәм балет театрында һаулыҡ мөмкинлектәре сикләнгән балалар өсөн “Аксаков шыршыһы”н үткәреү тураһында иғлан итте. – Яңы йыл байрамдарында бер генә бала ла иғтибарһыҙ ҡалмауы мөһим. Шулай уҡ ошо көндәрҙә аталары МХО-ла һәләк булғандарҙың балаларын хәстәрлек менән уратып алырға кәрәк, – тип йомғаҡ яһаны Радий Хәбиров. – Бөтә балалар ҙа спорт, мәҙәни саралар менән мәшғүл булһын өсөн эшләргә кәрәк. Улар яңы йылды тойһон өсөн. Фото: Башҡортостан Башлығы сайты.