🚩 230 гадоў таму ў Гродне юрыдычна спыніла існаванне адна з найбуйнейшых дзяржаў Еўропы — Рэч Паспалітая
25 лістапада 1795 года ў гродзенскім Новым замку кароль польскі і вялікі князь літоўскі Станіслаў Аўгуст Панятоўскі склаў з сябе паўнамоцтвы і падпісаў акт аб адрачэнні ад прастолу.
Такім чынам быў узаконены трэці падзел Рэчы Паспалітай. Тэрыторыі дзяржавы былі падзелены паміж Аўстра-Венгерскай, Прускай і Расійскай імперыямі. Параза паўстання Тадэвуша Касцюшкі ў 1794 годзе, скіраванага супраць падзелаў краіны, стала падставай для канчатковай ліквідацыі дзяржаўнасці трох народаў. Да моманту адрачэння краіны-акупанты ўжо вызначыліся з будучымі межамі.
Акт Панятоўскага фармальна завяршыў існаванне Рэчы Паспалітай і надаў легітымнасць яе канчатковаму раздзяленню. Пад аховай 120 расійскіх драгун Панятоўскі прыбыў з Варшавы ў Гродна пад наглядам расійскага намесніка графа Рапніна, дзе і падпісаў акт аб адрачэнні.
Пазней тры імперыі заключылі «Пецярбургскую канвенцыю», якая прадугледжвала адмову ад польскага каралеўскага тытула: манархі абавязаліся больш не выкарыстоўваць яго ў спісе сваіх тытулоў. Сам Панятоўскі апошнія гады жыцця правёў у Пецярбургу і памёр у лютым 1798 года — фактычна як ганаровы палонны на чужыне.
