Служба иконе Богородице Геронтисса
Служба Славней Владычице Нашей Пресвятей Богородице пред иконой Ея «Геронтисса»
Месяца декабрь в 2-й день, апрель 4-й день
На велицей вечерни
На Господи, воззвах: стихиры, глас 8
Подобен: О преславного чудесе:
Днесь соверша́я пра́здник торжества́ Богоотрокови́цы,/ прииди́те празднолю́бных собо́ри соше́дшеся,/ воспои́м благодея́ний и чудес мно́жество,/ ве́рным быва́емым от о́браза Богоро́дицы,/ Геронти́сса имену́емаго,/ ра́дости сердца́ исполня́ет,/ и вся́кое проше́ние на по́льзу всех с ве́рою прося́щим подае́т,/ Дево всепе́тая// и неискусобра́чная.
Глас А́нгела Тебе́ ра́достно вопие́м:/ ра́дуйся, Благода́тная, Госпо́дь с Тобо́ю,/ Де́во нетле́нная и препросла́вленная,/ Ра́досте скорбя́щих, грешных Спору́чнице,/ мира Умире́ние и Очище́ние,/ небе́сных Чино́в Ликова́ние,/ дев Сла́ва, ма́терей Весе́лие,/ лю́бящим Тя сла́дкое хвале́ние// и всех нас Спасе́ние.
О, Де́во Всесвята́я,/ о, Добро́то несказа́нная,/ По́моще беспо́мощных,/ жезле ста́рости, юным Наста́внице,/ младе́нцем Питате́льнице,/ больны́х исцеле́ние,/ мона́шествующих сла́дкая Собесе́днице,/ супру́гов любве́ и согла́сие,/ непло́дным чадоро́дия Пода́тельнице,/ заблу́дшим на путь и́стины возвраще́ние,/ и всех родов Весе́лие.
Е́же ра́дуйся от Арха́нгела слы́шавшая,/ и ныне нам ра́дость ве́лию Сама посыла́ющая,/ явле́нием ико́ны Твоея́ Геронти́сса имену́емой./ От нея́ же всяк с ве́рою прося́щий/ да́ры оби́льныя прие́млет/ и Тебе ра́достно взыва́ет:/ ра́дуйся, Обра́дованная, с Тобо́ю Госпо́дь/ и Тобо́ю с нами.
Слава, и ныне, глас 6
Цве́ты хвале́бными Тя восхваля́ем, Богоро́дице,/ белосне́жный кри́не де́вства и чистоты́,/ Лозо́ виногра́да Христо́ва,/ Голуби́це кро́ткая и незло́бивая,/ Я́блоко благоуха́нное и медотеку́щее,/ Мати чадолюби́вая,/ ми́лостей бездно́,/ Раю сла́достный и присноцвету́щий,/ благода́ти Сосу́де златы́й и многоце́нный,/ непрестаю́щее пе́ние и хвале́ние А́нгелов,/ ра́дуйся, Неве́сто Неневе́стная.
Вход. Прокимен дне и чтения три.
Бытия́ чте́ние (глава 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезекии́лева чте́ние (главы 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.
При́тчей чте́ние (глава 9):
Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному,и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На Литии стихиры, глас 5:
Подобен: Радуйся:
Ра́дуйся, вселе́нныя Похвало́,/ ра́дуйся, Дево, Мати, Владычице,/ ра́дуйся, всех к Тебе прибега́ющих Засту́пнице,/ ра́дуйся, молитв на́ших Всеблага́я Скоропослу́шнице,/ ра́дуйся, ми́лости Пучи́но,/ ра́дуйся, исцеле́ний неисчерпа́емый Исто́чниче,/ ра́дуйся, градо́в утвержде́ние,/ ра́дуйся, во́инству нашему победо́,/ ра́дуйся, ста́рцев упокое́ние и христиа́нской кончи́ны устрое́ние,/ ра́дуйся, на Стра́шном Суде поможе́ние и Наде́ждо,/ ра́дуйся, всех родо́в весе́лие и ра́дование,/ ра́дуйся, Обра́дованная Богоотрокови́це,/ ра́дуйся, Ра́досте наша и Похвале́ние.
На стиховне стихиры, глас 1
Подобен: Небесных Чинов:
Моле́бнице наша те́плая,/ обра́дованная Богоневе́сто,/ миру Покро́ве и Поможе́ние,/ ненаде́ющихся Наде́ждо,/ Засту́пнице оби́димых,/ ско́рая Услы́шательнице к Тебе́ прибега́ющих,/ ста́рцев Укрепле́ние,/ оби́телей и́ноческих Наста́внице и Руководи́тельнице.
Ко́е досто́йное благодаре́ние/ принесе́м Ти, Чи́стая?/ За мно́жество даро́в Твоего́ милосе́рдия,/ явля́емаго от иконы Твоея Геронти́ссы/ с ве́рою к Тебе́ прибега́ющим,/ неду́ги бо душ и теле́с врачу́еши/ и избавля́еши от всех бед,/ моля́щися Бо́гу при́сно о душа́х на́ших.
Ра́дуйся Мари́е, вели́кое всея́ тва́ри Чу́до./ Ра́дуйся, а́нгелов украше́ние, му́чеников Сла́во,/ ра́дуйся, заблудшим Наставнице,/ ра́дуйся, Дщи́ у́бо Дави́дова, Госпо́дня же Ма́ти./ Ра́дуйся пе́ние Гаврии́лово. / Ра́дуйся Прибе́жище и По́мощь, и Спасе́ние душ на́ших.
Слава, и ныне, глас 5.
Подобен: Радуйся:
Красу́йся, Афо́не,/ ра́дуйся, оби́теле Вседержи́теля,/ се бо Цари́ца и Влады́чице всех,/ от всех родо́в сла́вимая,/ ико́ну Свою́ нам ми́лостивно явля́ет/ и струи́ ми́лостей оби́льно источа́ет,/ ста́рцев и ста́риц посеща́ет,/ и вход в Ца́рствие Небе́сное,/ я́ко блага́я Врата́рница, верным отверза́ет.
Тропарь, глас 4.
Днесь све́тло красу́ется оби́тель Пантокра́тор,/ и весь лик афо́нских отце́в,/ иму́ще чудотво́рный о́браз Влады́чицы Богоро́дицы,/ Геронти́сса имену́емый,/ от него́ же чудеса́ оби́льно Ма́ти Бо́жия излива́ет,/ па́че ста́рцев и ста́риц утеша́ет,/ оскуде́ние еле́я восполня́ет,/ боле́зни исцеля́ет./ Сего́ ра́ди и нам к Твое́й ико́не притека́ющим, Де́во,/ пошли́ Твою бога́тую ми́лость, / да и мы вкупе со Афо́ном вопие́м:/ ра́дуйся, Благода́тная,// Госпо́дь с Тобо́ю.
Ин по подобию афонского тропаря, гл.4
Я́коже дре́вле воззва́нием от ико́ны Твоея́,/ оби́тель Пантокра́тор спасла́ еси́ о́гненного запале́ния,/ та́ко и ны́не изба́ви от бед и напа́стей вся́кую оби́тель, град и страну́,/ Де́во Пречи́стая./ Игуме́ние на́ша ми́лостивая,/ да пое́м Ти и ра́достно взыва́ем:/ ра́дуйся, Благода́тная, Госпо́дь с Тобо́ю.
На утрени
По 1-м стихословии седален, глас 6
Днесь любо́вию пра́зднующе,/ честно́му образу Богоро́дицы Геронтисса поклони́мся/ и те́пле возопии́м:/ Ма́тернее дерзнове́ние к Сы́ну Твоему́ и Бо́гу, Де́во, иму́щи,/ испроси́ нам у Него́ проще́ние грехо́в,/ мир и ве́лию ми́лость.
Сла́ва, и ны́не, то́йже.
По 2-м стихословии седален, глас 1
Пресве́тлаго зра́ка Твоего явле́ние/ ра́дость прино́сит всем ве́рующим./ Афона бо Ты еси стра́жа неусы́пна,/ и стране́ на́шей от бед избавле́ние./ Те́мже пое́м Ти, Пречи́стая:/ покрыва́й нас при́сно Покро́вом Твои́м.
Сла́ва, и ны́не, то́йже.
На полиелеи величание:
Велича́ем Тя, / Пресвята́я Де́во, / Богои́збранная Отрокови́це,/ и чтим о́браз Твой святы́й, / и́мже то́чиши исцеле́ния / всем, с ве́рою притека́ющим.
Псалом избранный: Помяни́, Господи́, Дави́да и всю́ кро́тость его́. Пресла́вная глаго́лашая о тебе́ гра́де Бо́жий. Освяти́л есть селе́ние свое́ вы́шний. Помяну́ и́мя твое́ во вся́ком ро́де и ро́де.
По полиелеи седален, глас 6:
Исцели́ стру́пы души́ моея́, Богома́ти Влады́чице,/ я́ко не и́мамы по́мощи разве Тебе́, Блага́я Помо́щнице,/ Ра́досте и Спасе́ние всего ми́ра,/ Добро́то несказа́нная,/ ми́лости Бе́здно,/ спасе́ния Хода́таице,/ Гаврии́лово Удивле́ние,/ Арха́нгелов и А́нгелов многопе́тая Сла́во.
Сла́ва, и ны́не, то́йже.
Степе́нна, 1-й антифо́н 4-го гла́са. Проки́мен, глас 4:
Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние да хва́лит Го́спода. Ева́нгелие от Луки́, зача́ло 4.
По 50-м псалме́ стихи́ра, глас 6:
Просла́вим ве́рнии,/ Пресвяту́ю Деву Чи́стую,/ и поклони́мся чудотво́рному Ея́ о́бразу Геронти́сса имену́емому,/ чудеса́ бо оби́льно Богома́ти от него всем с ве́рою и любо́вию приходя́щим явля́ет,/ душе́вныя и теле́сныя неду́ги исцеля́ет,/ ста́рцев и ста́риц утеша́ет,/ и вся поле́зная ко спасе́нию проше́ния исполня́ет.
Канон, глас 4.
Песнь 1
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я,/ и воспою́, ра́дуяся, Тоя́ чуде́са.
Чудес Исто́чниче, Де́во,/ похвале́ния присноцвету́щий вене́ц/ недоуме́ю по достоя́нию приноси́ти Ти,/ скве́рны усты́ иму́ще,/ но ви́ждь души́ моея́ жела́ние, и сие́ приими́.
О, ве́лие чу́до,/ ка́ко сосу́ды оскуде́вшии, еле́ем напо́лнила еси́, Дево,/ милосе́рдие Твое́ сугу́бо показу́юще на оби́тели Пантакра́тор,/ та́ко и на́ши духо́вные сосу́ды напо́лни еле́ем до́брых дел, Всеблага́я.
Безчи́слено согреши́х, Де́во,/ и суда́ Сына Твоего́ бою́ся,/ но к Тебе прибегаю, спасения иский,/ от тя́жких и лю́тых мя спаси.
И́же Тобо́ю изба́вльшеся от бе́д,/ и Тебе́ ра́ди ра́дость получи́вше, Ма́ти Безневе́стная,/ я́ко пода́тельницу благу́ю,/ и засту́пницу благохва́льну вси́ прославля́ем.
Песнь 3
Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́,/ в Боже́ственней Твое́й сла́ве / венце́в сла́вы сподо́би.
Гла́сом от ико́ны Твоея́,/ гро́зно вразуми́ла еси́ неради́ваго бра́та,/ не пеку́щагося причасти́ть игу́мена,/ на одре́ сме́ртнем лежа́щаго,/ и то́й поспеши́ испо́лнити Твое́ повеле́ние.
Сла́дкой Пи́щи насы́тившыйся,/ ста́рец игу́мен с миром дух свой Го́споду предаде̂,/ Тя прославля́я, Богоневе́сто.
Ле́ность лю́тую души́ моея́,/ и се́рдца моего́ неможение,/ Ма́ти Бо́жия, исцели́ моли́твами Твои́ми,/ и спасе́нных мя́ ча́сти сподо́би,/ избавля́ющи мя́ тьмы́ и муче́ния,/ я́ко Еди́на упова́ние мое́ и утеше́ние.
Цельбоно́сный исто́чник ве́мы Тя, Богома́ти,/ и бе́здну ми́лости и щедро́т Твои́х испове́м, / уще́дри мя Богороди́тельнице / и исцеле́ние пода́ждь стра́ждущей души́ мое́й.
Седален, глас 4
Не отве́ржи мене́ во время ста́рости:/ внегда́ оскудева́ти кре́пости моей, Ма́ти Божия,/ не оста́ви мене́, Блага́я,/ по Бо́зе бо все упова́ние мое́ на Тя возла́гаю, Богоневе́сто.
Песнь 4
Ирмос: Седя́й в сла́ве на Престо́ле Божества́, / во о́блаце ле́гце/ прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.
А́нгельстии си́лы досто́йно Твоя́ хвалы́ воспе́ти не мо́гут, Чи́стая:/ мы́ же ны́не ра́бски прино́сим Ти́ Гаврии́лово ра́дование:/ Ра́дуйся, Благода́тная, Госпо́дь с Тобо́ю.
Чи́стая А́гнице,/ Де́во Ма́ти Отрокови́це,/ чи́ста мя́ сотвори́ от страсте́й теле́сных:/ я́ко да льсти́ваго изба́влюся сете́й,/ песносло́вя Тя́, Богора́дованная.
Исцеле́ний во́ды то́чиши при́сно, Де́во,/ все́м боля́щым, я́ко о́блак одушевле́н сы́й Царя́ Христа́./ Те́мже молю́ Тя приле́жно:/ ро́су исцеле́ния мне́ боля́щему низпосли́.
Елее́м ми́лости Твоея́, Госпоже́,/ пома́жи стру́пы и гное́ния души́ моея́/ и ру́ку по́мощи простри́,/ возводя́ от истле́ния живот мой.
Песнь 5
Ирмос: Ужасо́шася вся́ческая / о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Святота́тца, икону Твою разсещи́ хотя́щаго,/ наказа́ла еси́ слепото́ю, Влады́чице,/ и зало́гу Твоего к нам благоволе́ния безвре́менно поги́бнути не попусти́ла еси́.
На сме́ртнем одре́ лежа́,/ сараци́н пока́яся во гресе́ свое́м и откры́ место,/ иде́же пребы́сть ико́на Твоя многоле́тне невреди́ма,/ да не сокры́т будет исто́чник Твоего́ к нам благоволе́ния, Чи́стая.
Ико́на Твоя, многоле́тне потае́нная,/ неврежде́нна обре́теся дивно, Богоро́дице,/ на утеше́ние наше и заступле́ние.
Кий грех не сотвори́,/ кое зло не вообрази́ в души моей, Дево,/ но Ты Сама́ мя наста́ви на путь покая́ния.
Песнь 6
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те рука́ми воспле́щим, / от Нея́ ро́ждшагося Бо́га сла́вим.
Ми́лостивным и кро́тким Твои́м о́ком, Богороди́тельнице,/ зря́щи мя́ во обстоя́нии и ско́рби одержи́ма,/ вско́ре свободи́:/ Тя́ бо призыва́ю на по́мощь.
За́вистию уя́звлен и душу скве́рными по́мыслы окаля́х, окая́нный,/ и ка́ко возмогу́ пока́ятися,/ не испра́влен пребыва́ю,/ но Ты, Чи́стая, даждь ми слезы умиле́ния.
Несть исцеле́ния пло́ти моея́ от мно́жества грехов моих, Дево,/ но Ты, яко хо́щеши и мо́жеши, помо́зи мне.
Ши́пок благово́нный/ и сокро́вище многоце́нное,/ иму́ще ико́ну Твою́ Геронтисса именну́емую,/ ра́дуемся гре́шнии и благодаре́ние по си́ле прино́сим.
Кондак, глас 2
Пречи́стая Де́во Богоро́дице,/ Ра́дость на́ша Ты еси́ и похвало́,/ оби́телей мона́шествующих Геронти́сса ми́лостивая,/ ско́рая Услы́шательнице Тебе́ моля́щихся,/ ста́рцев Посеще́ние и Поможе́ние,/ скорбя́щих Весе́лие./ Те́мже Тя хва́лим и Тебе́ ра́достно взыва́ем:/ ра́дуйся, Влады́чице,/ всем ско́рая и ми́лостивая Помо́щнице.
И́кос:
Непоро́чная Богома́ти,/ Покрови́тельнице и Засту́пнице на́ша,/ сохрани́ лю́ди Твоя от всех бед, да ра́достно зове́м Ти:/ ра́дуйся, в печа́лех утеше́ние;/ ра́дуйся, Афо́на храни́тельнице;/ ра́дуйся, попече́ние скорбя́щих;/ ра́дуйся, стра́ждущих те́плое прибе́жище;/ ра́дуйся, огнь угаша́ющая и нас ди́вно спаса́ющая;/ ра́дуйся, во вся́ком обстоя́нии ско́рое вспоможе́ние;/ ра́дуйся, гре́шных Спору́чнице;/ ра́дуйся, пода́тельнице ве́чных благ;/ ра́дуйся, Геронти́ссо и храни́тельнице;/ ра́дуйся, наде́ждо ве́чнаго спасе́ния;/ ра́дуйся, Ра́досте всех ра́достей наших;/ ра́дуйся, Влады́чице,/ всем ско́рая и ми́лостивая Помо́щнице.
Песнь 7
Ирмос: Не послужи́ша тва́ри Богому́дрии / па́че Созда́вшаго,/ но, о́гненное преще́ние му́жески попра́вше,/ радовахуся, пою́ще: / препе́тый отце́в Госпо́дь и Бог, благослове́н еси́.
Души́ моея́ стра́сти всенеисце́льныя,/ Отрокови́це, исцели́,/ и уга́сший ле́ностию свети́льник мо́й возжзи́,/ и к покая́ния путе́м наста́ви, Де́во, / да ве́рою и любо́вию тя́ сла́влю.
Язы́ком зла́я глаго́лати не престаю́, / и им Тя воспева́ти дерза́ю,/ ка́ко не трепе́щу осужде́ния,/ но Ты, Ми́лостивая, поми́луй мя, / да пока́юся от злых мои́х дел.
Пра́здненство соверша́я иконы Твоея́, Де́во,/ к Трапе́зе Та́йной неосужде́но приступи́ти мя сподо́би, Влады́чице,/ да будет мне в живо́т вечный и безсме́ртный.
Услы́шательнице ско́рая/ и Кре́посте моя́, Пречи́стая,/ и Прибе́жище, и необоримая Стено́,/ и к Бо́гу Моли́твенница су́щи,/ ве́чнующаго пла́мене и гее́нны свободи́ мя.
Песнь 8
Ирмос: Отроки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет Пе́ти Тебе́: / Го́спода по́йте, дела́, / и превозноси́те Его́ во вся ве́ки.
Укра́шена ря́снами чистоты́,/ Пречи́стая Отрокови́це,/ ду́шу мою́ очисти от зло́бы скве́рныя/ и печа́ль мою на ра́дость преложи.
Смире́нием преукра́шена Влады́чице А́нгелов,/ и мое се́рдце украси́ сею́ доброде́телию,/ яко да сла́влю, Тя, Богоневе́сто.
Исцеле́ний бе́здну,/ и благода́ти пучи́ну, Чи́стая,/ позна́хом Тя́ мы́, гре́шнии./ Те́мже Ти́ мо́лимся:/ от ну́жд все́х изми́, Еди́на Пречи́стая,/ притека́ющих к покро́ву Твоему́.
Твою́ по́мощь да обря́щу, Богоневе́сто,/ в ча́с, во́ньже изы́дет ду́х мо́й,/ вско́ре изыма́ющи,/ изба́ви мя́ бесо́вскаго мучи́тельства, Пренепоро́чная,/ и не оста́ви мене́, Блага́я, пре́дану бы́ти и́м.
Песнь 9
Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т: / ра́дуйся, Всеблаже́нная Богоро́дице, / Чи́стая Приноде́во.
Егда́ дух мой от те́ла разлуча́тися бу́дет,/ тогда Сама́ ми предста́ни, Богоневе́сто,/ наде́ждою спасе́ния от(ъ)е́мля мой страх.
Я́ко ми́лостивая Ма́ти, Богоро́дице,/ приими́ мое сие́ малое моле́ние,/ и к Богу благоутро́бному принеси́,/ да поми́лует мя в день су́дный.
Еди́на Ты в жена́х благослове́нная,/ благодари́м Тя́ изба́вльшеся Тобо́ю грехо́в мно́гих,/ и не́мощей и боле́зней и неду́г лю́тых,/ Пречи́стая Влады́чице.
Ли́ки приими́ Арха́нгел же,/ и мно́жество вы́шних во́инств Зижди́теля моего́:/ апо́стол же и проро́к собо́ры,/ и му́ченики, и преподо́бныя, и священному́ченики:/ и моли́тву сотвори́, Чи́стая, за на́с к Бо́гу.
Свети́лен:
Све́том де́вства и чистоты Твоея́,/ души моея́ мрак отжени́, Богоотрокови́це,/ да убеле́ны ри́зы иму́ще, вни́ду в радость Го́спода Моего/ и зрю Тя, Всенепоро́чную Влады́чицу.
На хвалитех стихиры, глас 1.
Подобен: Небесных чинов:
Прииди́те, вси лю́дие,/ верою соше́дшеся,/ просла́вим Влады́чицу Богоро́дицу,/ Засту́пницу ро́да на́шего,/ и, обстоя́ще честну́ю ико́ну Ея́ Геронтисса,/ любе́зно облобыза́им ю, глаго́люще:/ ра́дуйся, Пречи́стая Де́во,/ ра́дуйся, Ма́ти Го́спода Вы́шняго,/ ра́дуйся, Покро́ве и Спасе́ние душ на́ших.
Храм Божества́ су́щая,/ Вмести́лище простра́нное благода́ти и милосе́рдия/ яви́лася еси́ Ты, Богоневе́сто./ Услы́ши у́бо ско́ро рабо́в Твои́х, Всеблага́я,/ и пода́ждь скорбя́щим утеше́ние,/ бе́дствующим от бед избавле́ние,/ боля́щим здра́вие/ и всем ве́рным ве́лию ми́лость.
В боле́знех и напа́стех одержи́мыя не пре́зри, Многопе́тая,/ но мольбу́ худу́ю услы́шавши,/ свободи́ на́с от неду́гов душе́вных и теле́сных страсте́й/ да ве́рно Тя Чи́стая, воспева́ем/ и ми́лость Сы́на Твоего́ и Бо́га на́шего прославля́ем.
Слава, и ныне, глас 6.
Подобен: Все отложше:
Обра́дованная и Сла́вная Отрокови́це,/ от всех родо́в Избра́нная,/ до́брая и кра́сная в жена́х,/ всея́ тва́ри честне́йшая и вы́сшая,/ Чи́стая и Непоро́чная,/ Де́во и Ма́ти Неискусобра́чная,/ ра́дуйся, Неве́сто Неневе́стная.
Тропарь, глас 4.
Днесь све́тло красу́ется оби́тель Пантокра́тор,/ и весь лик афо́нских отце́в,/ иму́ще чудотво́рный о́браз Влады́чицы Богоро́дицы,/ Геронти́сса имену́емый,/ от него́ же чудеса́ оби́льно Ма́ти Бо́жия излива́ет,/ па́че ста́рцев и ста́риц утеша́ет,/ оскуде́ние еле́я восполня́ет,/ боле́зни исцеля́ет./ Сего́ ра́ди и нам к Твое́й ико́не притека́ющим, Де́во,/ пошли́ Твою бога́тую ми́лость, / да и мы вкупе со Афо́ном вопие́м:/ ра́дуйся, Благода́тная,// Госпо́дь с Тобо́ю.
Ин по подобию афонского тропаря, гл.4
Я́коже дре́вле воззва́нием от ико́ны Твоея́,/ оби́тель Пантокра́тор спасла́ еси́ о́гненного запале́ния,/ та́ко и ны́не изба́ви от бед и напа́стей вся́кую оби́тель, град и страну́,/ Де́во Пречи́стая./ Игуме́ние на́ша ми́лостивая,/ да пое́м Ти и ра́достно взыва́ем:/ ра́дуйся, Благода́тная, Госпо́дь с Тобо́ю.
Кондак, глас 2
Пречи́стая Де́во Богоро́дице,/ Ра́дость на́ша Ты еси́ и похвало́,/ оби́телей мона́шествующих Геронти́сса ми́лостивая,/ ско́рая Услы́шательнице Тебе́ моля́щихся,/ ста́рцев посеще́ние и поможе́ние,/ скорбя́щих весе́лие./ Те́мже Тя хва́лим и Тебе́ ра́достно взыва́ем:/ ра́дуйся, Влады́чице,/ всем ско́рая и ми́лостивая Помо́щнице.
Величание Богородице:
Досто́йно есть / велича́ти Тя, / Богоро́дице, / Честне́йшую Херуви́м / и Сла́внейшую / без сравне́ния Серафи́м.
Велича́ем Тя, / Пресвята́я Де́во, / Богоизбра́нная Отрокови́це,/ и чтим о́браз Твой святы́й, / и́мже то́чиши исцеле́ния / всем с ве́рою притека́ющим