Пайдалы дыгъар этилинген

Пайдалы дыгъар этилинген

Дагъыстанны бавчуларыны союзу ишлерин генглешдире, байлавлукълар тута ва тюрлю-тюрлю выставкаларда ортакъчылыкъ эте. Артдагъы жумада Краснодар шагьарда оьтгерилген выставка олар учун пайдалы болгъан: олар Ростов шагьардагъы «Праймкул системс» деген компания булан Хасавюрт районда емиш сакълайгъан ер этмекни гьакъында дыгъар байлагъан.

Дагъыстанда йыл сайын бавлар арта ва 28 минг гектарда ерлешген, шолардан 22 минг гектары емиш бере. Йыл сайын шо санавлар артажакъ ва болдурулгъан емишни нетме герек? Кёбюсю гьалда уллу харжлар да чыгъарып элтип, емишни Дагъыстандан тышда сатма борчлу бола. Инг де тамашасы, емишни болдургъанлар сатмай, арачылар олардан учузлайын ала ва оьзлени багьасын да юклеп сата. Тек шону къыш айлар болгъанча сакълама имканлыкъ болса, шонча къыйын тёгюп болдурулгъан емиш, есине арив хайыр берме бола. Шону учун да, емишни сакълайгъан ерлер болмакъ, хайырны башы деме ярай.

Краснодарда оьтгерилген юрт хозяйство техниканы, шолагъа тиркейген алатланы, емишлени сакълайгъан ва гьатта ишлетеген къуралланы 32-нчи Халкъара выставкасы оьтгерилди. «Югагро» деп ат тагъылгъан выставкада Дагъыстанны делегациясы да ортакъчылыкъ этген. Шонда «Дагъыстанны бавчуларыны союзуну» генереальный директору Сайдулла Орусханов ва «Праймкул системс» деген ихтиярлары дазулангъан къурумну генеральный директору Алексей Худолей Хасавюрт районда емиш сакълайгъан ер къурмакъгъа дыгъар этген.

--Емишлени узакъ сакълап болмакъмакъ, юрт хозяйствода ишлейгенлени хайырын артдырмакъ деген бола, - дей Сайдулла Орусханов мени булангъы лакъырында. -Хасавюрт районда янгыз интенсив къайдадагъы бавланы майданы 660 гектаргъа етише. Болдурулгъан емишни сатма болмай бавчулар бек инжинелер, базарлагъа барса да ерлер ёкъ, заманда бир оьтгерилеген ярмкюлер де ишни тюзелтмей. Гьали къурулажакъ ерде 1 минг тон емишни сакълама болажакъбыз. Шону да къурув, сонг ишге салыв да 2026-нчы йылны ичинде болажакъ.

С. Орусханов айтагъан кюйде, ол Алексей Худолей булан таныш, ону компаниясы Темиркъазыкъ Кавказда, шолай Дагъыстанда да емиш, яшылчалар сакълайгъан ерлер этген. Шоланы емиш сакълав къуралы емишни пайдалы янын бузмай сакълай. Ондан къайры да бавчуланы сиптесин Дагъыстанны юрт хозяйство ва сурсат министерлиги, шолай да Хасавюрт районну администрациясы якълагъан ва къурма ерге де ихтияр берген.

Дыгъар этивню заманында Дагъыстанны юрт хозяйство ва сурсат министрни 1-нчи орнунбасары Шарип Шарипов да ортакъчылыкъ этген.

-Бизин министерлик шулай проектлени гьар заманда да якълагъан, - дей Ш.Шарипов. - Дагъыстанда болдурулгъан емишлер кёп ерлерде талаплы. Янгы емиш сакълайгъан ерге дыгъар этмек де, бизин гиччирек буса да оьрлюгюбюз. Дагъыстанда бугюнге ерли 45 минг тон емиш сакълама ерлер этилинген. Бара-бара биз шулай ерлер гьар районда да болагъан кюйню этежекбиз.

Г. БЕК.