Ошо йәшемәсә әсәйле булғаным өсөн Хоҙайға мең рәхмәт

Хеҙмәттәшебеҙ Нәсих Хөббөтдин улы Хәлисов әсәһе тураһында бына ни яҙа: "Бар донъяны йылыта алырлыҡ оло йөрәк. Ауыр һынауҙар үткәндә лә тормошҡа һөйөп бағыу. Илар саҡта ла йылмайырға көс табыу... Бындай сифаттар – әсәйҙәрҙә генә. Уларҙың рухы, ихтыяр көсө, йөрәк йылыһы тормош усағын һүндермәй һаҡлай.Түҙемле лә инде Әсә йөрәге!Әсәй! Был һүҙҙә күпме наҙ, йылылыҡ бар. Әсәй – һәр бер кеше өсөн иң ҡәҙерле, иң һөйкөмлө зат ул.Ҡәҙерле кешем Әбйәлил районының Хәлил ауылында тыуған. Быйыл йәй ул 90 йәшен тултырҙы, Аллаға шөкөр. Әсәйем йәш кенә килеш кейәүгә сығып, артабанғы бар ғүмерен килен булып төшкән еренә – ошо райондың Ишбулды ауылына бәйләй. Атайым менән күмәк балаларын эшһөйәр, уңған, әҙәпле, маҡсатлы, һөнәрле итеп үҫтерҙе улар. Әсәйемә, атайымдан иртә яңғыҙ ҡалып, тормошта күп ҡайғы-хәсрәттәр күрергә тура килде. Ә балаларҙан иң тәүҙә Сәүиә һеңлемде юғалттыҡ, унан Фәнил ҡустым китеп барҙы. Фәтих ағайымды, Фатима еңгәмде һуңғы юлға оҙатыу ҙа әсәй йөрәгенә юйылмаҫ яралар һалды. 2017 йылдың май айында әсәйебеҙҙең өйө янып, бөтә донъяһы ут аҫтында ҡалды. Ә быйыл аяғын һындырып, операция эшләтеп, иҫән-һау ҡалды. Был һынауҙарға ла һынманы, һығылманы ҡәҙерлебеҙ. Аллаға шөкөр, Айрат ҡустым менән Рәйлә килен Әсәйҙе өрмәгән ергә ултыртмай, ҡәҙер итә, оло хөрмәт күрһәтә.ӘСӘЙ! Һин беҙҙең алтын бағанабыҙ, һыйыныр ышығыбыҙ, күңелебеҙҙе өҙлөкһөҙ йылытҡан, көс-ҡеүәт биргән ҡояшыбыҙ, оло кәңәшсебеҙ! Рәхмәт Һиңә, ӘСӘЙ! Беҙҙе гел һағынып көткән ғәзиз кешебеҙгә артабан да бәхетле ҡартлыҡ, ҡоростай ныҡлы сәләмәтлек, күңел бөтөнлөгө, барлыҡ яҡындарының ихтирам-хөрмәтен, һөйөүен тойоп, уларҙың уңыштарына һөйөнөп, оҙон-оҙаҡ ырыҫ-бәрәкәтле ғүмер кисереүен теләйем. Ошо йәшемәсә әсәйле булып йәшәүемә Хоҙайға мең рәхмәт, мең шөкөр тием!" Фото: Н. Хәлисовтың шәхси архивынан. Беҙҙең МАХ каналына https://max.ru/gazetabashkortostan ҡушылығыҙ!