Салауат көрәшселәрҙе көтә

Көрәш – башҡорт мәҙәниәтенең айырылғыһыҙ бер өлөшө. Элек-электән ул халыҡ һәм дини байрамдарҙың матур йәме булған. Бөгөн дә ул спорт һөйөүселәрҙә ҙур һорау менән файҙалана, күптәр уның менән даими шөғөллнә. Ошо шәмбе һәм йәкшәмбе Салауат ҡалаһындағы “Нефтехимик” спорт һарайында полиция генерал-лейтенанты Артур Әхмәтханов иҫтәлегенә арналған Бөтә Рәсәй көрәш турниры үткәрелә. Ярыштар 10 сәғәттә башлана, ә сараны асыу тантанаһы 12 сәғәттә була. Генерал-лейтенант Артур Әхмәтханов Башҡортостанда көрәште һәм дзюдоны популярлаштырыуға тос өлөш индерҙе. Уның иҫтәлегенә арнап ойошторолған турнирҙа Рәсәйҙең төрлө төбәктәренән спортсылар ҡатнаша. Әйткәндәй, был спорт сараһы быйыл бишенсе тапҡыр уҙғарыла. Уны үткәреү республика өсөн изге йолаға әйләнде. Бында иң яҡшы спортсылар ярышып ҡына ҡалмай, күренекле шәхесебеҙҙе лә иҫкә ала һәм был спорт төрөн тағы ла таратыуға ҙур өлөш индерә. Ә Артур Фәрүәз улы Әхмәтханов ысын илһөйәр ине, нисек йәшәргә һәм эшләргә тейешлеккә сағыу миҫал булды. Ул Ватанын, спортты үҫтереү өсөн дә күп эшләне. Көрәшкә килгәндә, ул – мең йыллыҡ тарихы булған спорт төрө. Һуңғы йылдарҙа уның икенсе һулышы асылды. 2018 йылдан рәсми спорт ярыштарының һаны ике тапҡырға артҡан. 2018 йылда спорт мастерлығына бер генә кандидат та булмаһа, 2019 йылда был исемде 1015 спортсы алған. Төбәктә, дөйөм алғанда, 3 мең спортсы көрәш менән шөғөлләнә. Был – республикала спортҡа комплекслы ярҙам итеү һөҙөмтәһе ул. Алтынсы тапҡыр үткәреләсәк турнир уңышлы булыр тип көтөлә, сөнки беҙҙә көрәштең барлыҡ төрҙәренең дә үҫешенә булышлыҡ итеү өсөн барыһы ла эшләнә. Өҫтәүенә бындай сараларҙың йәштәрҙә илһөйәрлекте үҫтереүҙә лә әһәмиәте ҙур. Салауат ҡалаһындағы “Нефтехимик” һарайына был спорт сараһын ҡарарға һәм унда ҡатнашыусылар өсөн “көйөргә” саҡырабыҙ. Фото: Салауат ҡалаһы хакимиәте. БЕЛЕШМӘ. Артур Фәрүәз улы Әхмәтханов 1962 йылдың 15 ноябрендә Салауат районының Торналы ауылында тыуған. 1981 – 1983 йылдарҙа СССР Ҡораллы Көстәрендә хеҙмәт итә. 1985 йылда эске эштәр органдарына хеҙмәткә ҡабул ителә һәм Өфө ҡалаһының енәйәтте тикшереү бүлеге оперуполномоченныйынан алып Өфөнөң Орджоникидзе районы эске эштәр идаралығы начальнигына тиклем үрләй, алты йылға яҡын республика ЮХХДИ-һын етәкләй, 2005 – 2008 йылдарҙа – Башҡортостандың эске эштәр министры урынбаҫары, йәмәғәт именлеге милицияһы хеҙмәте начальнигы, 2008 – 2016 йылдарҙа Төньяҡ Осетияла эске эштәр министры була. Ул һуңғы көндәренә тиклем Хөкүмәт Премьер-министры урынбаҫары вазифаһында эшләне. Хеҙмәт итеү осоронда Артур Әхмәтханов IV дәрәжә “Ватан алдындағы хеҙмәттәре өсөн” ордены, Салауат Юлаев ордены, II дәрәжә “Ватан алдындағы хеҙмәттәре өсөн” орденының миҙалы, исемле ҡорал, шулай уҡ башҡа дәүләт наградалары менән бүләкләнә. Марат ЗАРИПОВ, Ишембай районының Физик культура, спорт һәм туризм идаралығы етәксеһе, Рәсәйҙең көрәш буйынса спорт мастеры, Башҡортостан Көрәш федерацияһының башҡарма директоры, республиканың көрәш буйынса иң яҡшы тренеры, Рәсәй, БДБ илдәре, донъя чемпионаттарында еңеүселәр тәрбиәләгән: – 22-23 ноябрҙә Салауат ҡалаһындағы “Нефтехимик” спорт һарайында полиция генерал-лейтенанты Артур Әхмәтханов иҫтәлегенә арналған көрәш буйынса Бөтә Рәсәй ярыштары үтәсәк. Был спорт сараһы бишенсе тапҡыр үткәрелә һәм уға илдең 25 төбәгенән вәкилдәр киләсәк. Шулай итеп, көслө көрәшселәр үҙ төбәгенең данын яҡлаясаҡ. Быға тиклемге ярыштар Өфөлә үткәрелгәйне, быйылғыһын Салауат ҡалаһында ойошторорға ҡарар иттек.