Республика башлығы менән оператив кәңәшмәнән иң мөһиме

Республика башлығы менән оператив кәңәшмәнән иң мөһиме:

💉 Башҡортостанда 1 миллион 565 мең кеше грипҡа ҡаршы вакцинация эшләткән. Ғөмүмән алғанда, Һаулыҡ һаҡлау министрлығы республика халҡының кәм тигәндә 60 проценты, йәғни 2 миллион ярым кеше прививка яһатыр, тип иҫәп тота. Уларҙың 667 меңе – балалар.

👷🏻‍♂️ Республикала ике яңы кадрҙар үҙәге асылды. Яңы модулле үҙәктәр Дыуан һәм Баҡалы райондарында төҙөлдө. Хәҙер Башҡортостанда 51 ошондай үҙәк халыҡты эш урындары менән тәьмин итә.

🎖️ МХО-ла ҡатнашыусы Максим Балль Шайморатов генерал миҙалы менән бүләкләнде. Максим – көрәш буйынса тренер, хәрби операцияға үҙ теләге менән юлланған. Дәүләт наградаһына яугир яраланғандарҙы яу яланынан алып сыҡҡанда күрһәткән батырлығы өсөн лайыҡ булды.

📲 «Дәүләт хеҙмәттәре» порталы аша республика халҡы башлыса табиптарға яҙыла, Росреестрға һәм суд приставтарына мөрәжәғәт итә. Шулай уҡ граждандар был сайтта үҙ исемдәренә кредит алыуға тыйыу ҡуя. Тыйыу ғәмәлдә булғанда, банктар һәм кредит ойошмалары кешене шәхси ҡабул итмәйенсә, уға кредит иҫәбе аса алмай. «Дәүләт хеҙмәттәре» порталында Башҡортостандан көн һайын 1 900 мөрәжәғәт теркәлә.

🦾 Башҡортостанда һаулыҡ мөмкинлектәре сикләнгән кешеләрҙең 46 меңе спорт менән даими шөғөлләнә. 811 спорт үҙәгендә 6 меңгә яҡын адаптив майҙансыҡтар булдырылған. Волга буйы федераль округында Башҡортостан был күрһәткес буйынса 5-се урында килә.

🍞 Республиканың аҙыҡ-түлек сәнәғәте йыл башынан 172 миллиард һумға ризыҡ етештергән. Йыл аҙағына тиклем был күрһәткес 230 миллиард һумға етер, тип көтөлә. Аҙаҡҡы 5 йыл эсендә сәнәғәттең был тармағы ҡеүәтен 70 процентҡа арттырған. 2022 йылдан алып Башҡортостанда аҙыҡ-түлек предприятиеларына ярҙам программаһы тормошҡа ашырыла, уның сиктәрендә ҡоролмаларҙы яңыртыу маҡсатында республика бюджетынан 250 миллион һум бүленгән.