Компаніа Blue Origin Джефа Безоса имаше успѣх вторократнаго пуска ракеты си New Glenn, пустившы два космичных пробника NASA. Ракета вышиноіѫ 98 метров іе была пущена из космодрома космичных сил США на мысу Канаверал (Флорида) послѣ опоздненіа в четыри дніа с поводу худоі погоды и сълнечных бурі.
Мисіа, же іе достала имѧ ESCAPADE, имаше буджет 80 млн доларов. Два истых космичных пробника бѫдѫт на колобѣгу Земли 10 мѣсѧцев, а послѣ с помочіу гравитациінаго маневра бѫдѫт послани к Марсу, до котораго хте сѧ приблизѧт в 2027 году.
Главно заданіе мисіи іе описаніе върхних слоіов атмосферы и магнитных поліеі Марса дліа изученіа их взаіемодѣіности с сълнечным вѣтром. Ово изъисканіе хте поможе поіаснити, како Марс іе залишил своіѫ атмосферу, сѧ обративши од влажнаго до сухаго міра, а такоже бѫде помогати бѫдѫчим космонавтам забранити од радіаціи. Управница научнаго правеніа NASA Ники Фокс подчъркнуше, же мисіа ESCAPADE іе чѧстіу изученіа минулости и нынешности Марса за да избѣжати огрожені първых космонавтов, кторы хте бѫдѫт послани на ову планету.
В овому полету компаніа Blue Origin напърво имаше успѣх возвратити първы стѫпені ракеты-носителіа послѣ оддѣленіа и пуска втораго стѫпеніа. Първы стѫпені имаше успѣшно поставеніе на морску платформу, ктора бѣше в 600 километрах од брега, что іе веліми важным кроком до повторнаго корыстаніа компонентов ракеты и сниженіа трат. New Glenn іе второіѫ ракетоі, ктора іе проведла овы маневр. Илон Маск поздравише Безоса и іегову компаніу с овым успѣхом.
Чрез двадесѧт хвилин послѣ пуска главна цѣлі мисіи іе была достигнѫта, вторы стѫпені ракеты изведоше на потрѣбны колобѣг обадва марсіанскых пробника.
Мрежна версіа: Кирилица / Latinica