Чаҕылхай сулус Харысхал
Мээндиги мэник уола
,,Үөннээх, алаас оҕото,
Номоххо киирдэ Харысхал.
...Сөҕөн - махтайан тураннар,
Кими маннык кэпсээбиттэрин,
Олус сылаастык ахтыбыттарын
Өйдөөбөппүн мин,
Кэлиҥҥи кэми эттэххэ.
Арай улуу Суоруну
Суохтаабыттара эбитэ буолуо,
Барбытын кэннэ хараастан.
...Сылдьыбатах сирэ суох -
Барытын кини кэрийбит!
Саха чулуу уолаттарын
Сүппүт суолларын ирдэһэн,
Олорбут сүдү олохторун
Норуокка арыйан көрдөрөөрү,
Бэйэбитинэн киэн туттан -
Тирэхпитин булунарга көмөлөһөөрү,
Амма уола Харысхал
Ыраах айаҥҥа туруммутун
Өйдөөтүбүт биһиги билигин.
...Харысхал аны
улуутуйда. Аартыга арылынна.
Чаҕылхай сулуһа сандаарда!
Кэнэҕэһин даҕаны
Кэпсээҥҥэ сылдьыа, Харысхал!
Саха омук Харысхалга
Махтанара дириҥээн иһиэ,
Драмалара театрга
Куруук мэлдьи туруохтара!
Убайбыт сылдьыбыт суола,
Маҕан хаар түстэҕин аайы
Тыргыллыа аны сүппэккэ...
Улар Моисеев
