“Һәнәк”тәр антология сығарҙы

Күптән түгел “Һәнәк” журналы тәүге һаны донъя күреүгә 100 йыл тулыуын бик матур итеп билдәләне. Бындай ҙа иҫтәлекле датаны сатира-юмор эйәләре ентекле әҙерләнеп ҡаршыланы. Юбилей кисәһе үткәреп кенә ҡалманылар, “Һәнәк”тең үҙ йыйынтығын баҫтырып сығарҙылар. Бәләкәй булһа ла, тотош антология ул. Унда 100-гә яҡын авторҙың юморескаһы ингән. Унан инде ҡунаҡтар саҡырып, “Көлә-көлә “Һәнәк” килә!” баҫмаһы менән таныштырып та ҡуйҙылар. Өфөнөң нәҡ үҙәгендә урынлашҡан “Китап” нәшриәте кибетенең саралар үткәрә торған ыҡсым ғына майҙансығында “Һәнәк”тең байтаҡ дуҫы йыйылды. Бында 30 йыл буйы арымай-талмай журналды “һөйрәгән” билдәле сатирик, хәҙер инде Башҡортостандың халыҡ яҙыусыһы Марсель Сәлимов, шулай уҡ баш мөхәррире вазифаһында хеҙмәт итеп киткән танылған прозаик Миләүшә Ҡаһарманова, күп йылдар буйы журналдың алмаштырғыһыҙ авторҙары булған Сөләймән Латипов, Леонид Соколов, Винер Исхаҡов һәм башҡа юмор һөйөүсе заттар йыйылды. Гәзитебеҙҙең алыштырғыһыҙ фотохәбәрсеһе Айрат Нурмөхәмәтов менән беҙ ҙә был ихлас кисәлә булып, йор һүҙле сығыштар ҡарап кинәндек. Йыйнаҡ ҡына, йылы ғына кисәне шаян һүҙ оҫтаһы Вәлит Илембәтов һәм “Ҡыҙыҡ менән Мәҙәк” сатира һәм юмор театры ағзаһы Валерий Назаров алып барҙы, моңло йырсылар Венера Юлгилдина, Юнир Һағынбаев музыкаль яҡтан биҙәне. “Юбилей йылында журналдың антологияһын сығарырға, тигән хыялыбыҙҙы тормошҡа ашырҙыҡ, – тип ҙур ҡыуаныстары менән уртаҡлашты хәҙер “Һәнәк” яҙмышы өсөн яуаплы булған Илгиз Ишбулатов. Ул сатира, юмор аҡһаҡалдары Марат Кәримов менән Марсель Сәлимовҡа баҫманы әҙерләгәндәге төплө кәңәштәре, уны әҙерләүҙә, баҫтырып сығарыуҙа өлөшө булған һәр кемгә рәхмәт һүҙҙәрен төбәне. “Һәнәк”тең антологияһын әҙерләп сығарыуға, тәбиғи, журнал коллективы ағзалары ҙур тырышлыҡ һалған. Уның мөхәррире – журналдың етәксеһе, тапҡыр телле Илгиз Ишбулатов, төҙөүсеһе – яуаплы секретары, танылған юмор оҫтаһы Марат Әминев, биҙәлеш мөхәррире – талантлы рәссам Артур Василов, версткалаусыһы – редакция коллективының йәш көстәре сафындағы Диана Латипова. Китапҡа быуат дауамында сатира һәм юмор жанрында эшләгән 70 әҙип менән 30-лап рәссамдың ижад емештәре индерелгән, улар бөтәһе лә ҡасандыр “Һәнәк”тә баҫылып сыҡҡан. Бер һүҙ менән әйткәндә, “Һәнәк”тең 100 йыллығына – 100 автор” тигән девиз тулыһынса аҡланған. Авторҙар исемлегенә күҙ һалһаң, башҡортса сыҡҡан сатира һәм юмор журналына ниндәй олуғ таланттарҙың ижад көсө һалынғанын күрәһең. Мәжит Ғафури, Ғариф Ғүмәр, Сәйфи Ҡудаш, Шәйехзада Бабич, Имай Насыри, Нәҡи Иҫәнбәт, Сәғит Агиш, Зәйнәб Биишева, Рәшит Ниғмәти, Баязит Бикбай, Назар Нәжми, Мостай Кәрим һәм башҡа башҡорт рухиәте донъяһында тәрән эҙ ҡалдырған шәхестәр – уларҙы һанай китһәң, ҡағыҙ биттәре етмәҫ! Инде тарихта ҡалған арҙаҡлы исемдәр менән бергә, хәҙерге заман башҡорт сатира һәм юморы үҫешенә тос өлөш индергән Риф Мифтахов, Марсель Сәлимов, Рәдиф Тимершин, Наил Ғәйетбай, Рәлиф Кинйәбаев, Салауат Әбүзәр һәм башҡалар, әлеге көндә шаян һүҙ менән заман күренештәрен, ысынбарлығын сағылдырыуға күңелен биреп хеҙмәт иткән йәшерәк ҡәләм оҫталары ла урын алған антологияла. Бер һүҙ менән әйткәндә, был ҡарар күҙгә бәләкәй, әммә йөкмәткеһе яғынан тос булған йыйынтыҡ тормошто йәнлерәк һәм ҡыҙыҡлыраҡ итеүҙә сатира менән юмор тигән ике дуҫты юлдаш иткән, йәшәйешкә “Һәнәк” йәптәре аша бағырға ынтылған заттар өсөн ҡыҙыҡлы булыр, моғайын. Был уңышлы баҫма “Һәнәк”тәге коллегаларыбыҙға артабан да көлә-көлә алға барырға ярҙам итһен, тип теләйбеҙ. Рәүилә ҒАТАУЛЛИНА. Айрат Нурмөхәмәтов фотолары.