Геном үҙәгендә мөһим осрашыу булды

Евразия фәнни-белем биреү үҙәге Халыҡ-ара студенттар кампусының Геном үҙәгендә Башҡортостан Хөкүмәте Премьер-министры Андрей Назаров һәм республиканың Дәүләт Йыйылышы – Ҡоролтай рәйесе Константин Толкачев рәйеслегендә Дәүләт Йыйылышы депутаттары менән осрашыу булды. Сара темаһы яҡындағы өс йылда республиканың социаль-иҡтисади үҫешенә һәм бюджетына прогноз параметрҙарын ҡарау булды. Был хаҡта Премьер-министр социаль селтәрҙәге сәхифәһендә лә хәбәр итте. Республика Хөкүмәте Премьер-министрының белдереүенсә, бындай осрашыуҙар матур йолаға әүерелгән. Был бюджетты планлаштырыу һәм республика үҫеше перспективалары кеүек көнүҙәк, ҡатмарлы фекерҙәр менән аралашыу мөмкинлеген бирә. - Депутаттар корпусына закон башланғыстарына булышлыҡ иткәне һәм республика Хөкүмәте менән һөҙөмтәле эш иткән өсөн рәхмәт белдергем килә. Тап ошондай конструктив һөйләшеү һөҙөмтәлерәк һәм уйланылған ҡарарҙар сығарырға булышлыҡ итә, - тине Андрей Назаров. Константин Толкачев үҙенең сығышында Рәсәйгә тышҡы сәйәси йоғонто яһап ҡарау ваҡыттарынан алып Башҡортостандың ил өсөн терәк төбәге булыуы һәм бындай баҫымға мөмкин тиклем ҡаршы тороуы тураһында һөйләне. Геном үҙәге тиккә генә осрашыу урыны итеп һайланмаған, тип хәбәр итте Башҡортостан Хөкүмәтенең матбуғат хеҙмәте. Бында уникаль Интеллектуаль генетика үҙәге урынлашҡан. Шулай уҡ “Мәктәп 21+” эшләй. Башҡортостан Хөкүмәте Премьер-министры үҙенең сығышында бөгөн республиканың үҫеш өсөн яҡшы мөмкинлектәргә эйә булыуы тураһында әйтте. Шулай итеп, биш йыл эсендә сәнәғәт тотороҡло үҫте – биш йылда 25 процентҡа артты. Был уртаса Рәсәй күрһәткестәренән 10 процентҡа күберәк. Башҡортостан ауыл хужалығы тармағында ла үҙ позицияларын нығыта. Ябай булмаған һауа шарттарында республика аграрийҙары 3 миллион 800 мең тонна тирәһе иген, 2 миллион тонна шәкәр сөгөлдөрө һәм 1 миллион тонна тирәһе май культураларын йыйған. Туғыҙ айҙа ауыл хужалығы продукцияһын етештереү 5,3 процентҡа артҡан. Шул уҡ ваҡытта Рәсәйҙә был һан 2 процент тәшкил итә. Һуңғы алты йылда Башҡортостан инвестицияларҙың йыл һайын тупланған күләмен өс тапҡырға арттырҙы һәм Инвестициялар климатының милли рейтингында 13 урынға күтәрелде. Башҡортостан Дәүләт Йыйылышы – Ҡоролтайҙың Бюджет, һалым, инвестиция сәйәсәте һәм милек мөнәсәбәттәре комитеты рәйесе Рузалия Хисмәтуллина ҡарауға тәҡдим ителгән республика бюджеты проектының социаль блоктың ағымдағы йыл күләмендә һәм хатта бер аҙ арттырылыуы менән планлаштырылыуы тураһында һөйләне. Осрашыу барышында депутаттар Иҡтисади үҫеш һәм инвестиция сәйәсәте, Финанстар министрлыҡтары етәкселәренең докладын тыңланы. Һөҙөмтәлә закон сығарыусылар теге йәки был йүнәлештәр буйынса аныҡлаусы һорауҙарын бирә алды. Сығанаҡ, фотолар: БР Хөкүмәте матбуғат хеҙмәте.