Бүреле күперендә ваҡытлыса төҙөкләндереү эштәре башланды

Баймаҡ районының Билал ауыл биләмәһенә ҡараған Өмөтбай, Баймырҙа, Һәмән, Күгиҙел һәм Билал ауылдары күрше Әбйәлил районы менән сиктәш һәм биләмә янынан Өфө – Амангилде –Йылайыр автомобиль юлы үтә. Тап ошо биләмәнән Әбйәлил районы Әхмәт ауылынан башланған Һаҡмар йылғаһы аға. Шуға күрә ауыл халҡының иң төп борсоған проблемаларының береһе –күперҙәрҙең төҙөк булмауы. Өмөтбайҙар бер нисә тапҡыр был мәсьәләне күтәреп тә ҡарай, әммә һөҙөмтә булмай. Өмөтбай ауылында 15 йылға яҡын староста булып эшләгән Зиннур Көмөшбаев үткән йылда район хакимиәте башлығы Азамат Иҙрисов халыҡ менән булған осрашыуҙа өмөтбайҙар тарафынан Бүреле йылғаһы аша һалынған күперҙе төҙөү район планына кертелеп, уның сафҡа инмәүе хаҡында белдерҙе. Азамат Сәфәрғәле улы шәхсән барып, Бүреле күперен барып ҡараны һәм ярҙам итәсәген белдергәйне. Тәүҙәрәк эштәр яҡшы уҡ башланып та китә. Күперҙе сафҡа индереү бурысы Макаров етәкләгән йәмғиәткә тапшырыла. Улар Бүреле күперенә тимер ҡулсалар ултырта, аҫты, нигеҙе тулыһынса нығытыла. Әммә аҡса булмау сәбәпле, эш аҙағына барып етмәй, туҡтап ҡала. Өмөтбай ауылының Баймырҙа урамында йәшәүселәр өсөн ысын мәғәнәһендә мәхшәр башлана. Бигерәк тә яҙлы-көҙлө, ямғырлы йәй айҙарында күпер янынан һалынған ваҡытлыса юл оло хәүеф тыуҙыра. Иҫке күпер һүтелеп, тимер ҡулсалар ултырған урын шул килеш асыҡ ҡала. Йәй көнө был урын балалар өсөн генә түгел, хатта мал-тыуар, ҡош-ҡорт өсөн дә ҙур хәүеф барлыҡҡа килтерә. Ауыл халҡы республика Башлығы Радий Хәбировҡа мөрәжәғәт менән сыға, былтыр төбәк Башлығы менән үткән тура бәйләнештә лә был һорау яңғырай. Ниһайәт, боҙ урынынан ҡуҙғалған. Макаров күпер төҙөлөшө өсөн тейешле финанс булмағас, килешеүҙе өҙә. Бөгөн Бүреле күперендә эштәр ҡайтанан башланған. Район етәкселеге ярҙамы менән әлегә ваҡытлыса күпер һалына башлаған. Киләсәктә күпер төҙөлөшө өсөн аҡса бүленеү менән Бүреле күперендә заман талаптарына яуап биргән өр-яңы күпер төҙөләсәк. ФЕКЕР: Зиннур Көмөшбаев, Өмөтбай ауылы старостаһы: - Кисә-бөгөн Бүреле күперендә эштәр башланды. Көндәр һыуытмаҫ, ҡар ҡапламаҫ элек ваҡытлыса күпер булыуы яҡшы. Әммә ауыл халҡы бының менән риза түгел, Бүреле йылғаһы аша өр-яңы һәм ышаныслы күпер кәрәк. Ғәйнулла Зәйнуллин, ветерандар советы рәйесе: - Өмөтбайҙарҙың әлегә өмөттәре аҡланманы. Беҙ яңы күпер өсөн мөрәжәғәт яҙҙыҡ, киләһе яҙҙан Бүреле йылғаһында өр-яңы күпер булыр, тигән ышаныста ҡалабыҙ. Автор фотоһы (фотолар былтыр район башлығы ауыл халҡы менән осрашҡандан һуң, Бүреле күперен ҡарағанда төшөрөлдө).