Тармаҡ тотороҡло үҫешә

Бөгөн, 20 ноябрҙә, Мәскәүҙә Рәсәйҙең мәҙәниәт министры Ольга Любимова менән Башҡортостан Башлығы Радий Хәбировтың киңәйтелгән осрашыуы үтте. Көн тәртибендә - ведомствоның төбәк менән хеҙмәттәшлек итеүе, шулай уҡ республиканың мәҙәни учреждениеларын яңыртыу мәсьәләләре. Илдең мәҙәниәт министры республикала тармаҡтың һөҙөмтәле эшләүен, атап әйткәндә, профилле учреждениелар – театрҙар, мәҙәниәт йорттары һәм клубтар селтәрен үҫтереүгә комплекслы ҡараш булыуын, шулай уҡ төрлө тематикаға бай, шул иҫәптән балаларға йүнәлтелгән сараларҙың күплеген билдәләне. 2023 йылдың декабрендә Өфөлә Ҡурсаҡ театрын реконструкциялау ошондай алымдың сағыу миҫалы булып тора. 2025 йылдың сентябрендә учреждение базаһында Беренсе “Ҡурсаҡ-фест” халыҡ-ара фестиваль үткән. Осрашыуҙа Башҡортостан Башлығы мәҙәниәт учреждениеларының төбәк халҡының ижтимағи тормошонда мөһим ролен һыҙыҡ өҫтөнә алды. Шуға бәйле объекттарҙы модернизациялауға ҙур иғтибар бүленә. - Республикала 4 меңгә яҡын мәҙәниәт учреждениеһы, уларҙа 11 мең самаһы кеше эшләй. Тап улар йәмғиәтебеҙҙең кәйефе өсөн яуаплы, шуға күрә беҙ был өлкәне үҫтереүгә етди ҡарайбыҙ, – тип билдәләне Радий Хәбиров. Мәскәү һәм Санкт-Петербург театрҙары сәхнәләрендә даими башҡорт постановкалары ла төбәктең уңышлы тәжрибәһен дәлилләй. Улар баш ҡала халҡын республиканың ижади коллективтары һәм уларҙың һөнәри оҫталығы менән таныштыра. Шуныһы мөһим, әҫәрҙәр федераль кимәлдә юғары баһа ала. 2025 йылда Башҡортостан театрҙары «Алтын битлек» милли премияһының ете наградаһына лайыҡ булған. Ә 26 ноябрҙә Рәсәйҙең Ҙур театрының яңы сәхнәһендә «Ете ҡыҙ» балеты тәҡдим ителәсәк, уны «Музыканы күрергә» X Бөтә Рәсәй фестивале сиктәрендә Башҡорт дәүләт академия опера һәм балет театры труппаһы башҡарасаҡ. Шулай уҡ ауыл йорттарын һәм клубтарын төҙөү һәм ремонтлау ҙа мөһим йүнәлеш булып тора. Быға типовой модуль конструкцияларын ҡулланыу яҡшы ярҙам итә. Төбәктә мәҙәниәт хеҙмәткәрҙәренә ярҙам итеүгә лә ҙур иғтибар бүленә. 2021 йылдан Башҡортостанда «Ауыл мәҙәниәт хеҙмәткәре» программаһы эшләй башланы. 2023-2024 йылдарҙа был проект сиктәрендә 60 белгес берәр миллион һум аҡса алған. Ә 2025 йылдан республика ошондай уҡ федераль программала ҡатнашҡан, уның буйынса 44 хеҙмәткәргә субсидия түләнгән. – Беҙҙең Башҡортостан менән министрлыҡ эшмәкәрлегенең бөтә йүнәлештәре буйынса ла һөҙөмтәле эш яйға һалынған, - тип йомғаҡ яһаны Ольга Любимова. Фекер алышыу барышында Өфө дәүләт циркын яңыртыу, республиканың Дәүләт академия рус драма театрын реконструкциялау, Йәш тамашасы театры урынлашасаҡ «Еңеү» кинотеатрын капиталь ремонтлау, шулай уҡ “Өфө-2” ҡаласығы археологик ҡомартҡыһы биләмәһендә депозитарий төҙөү проекттары ҡаралды. Башҡортостан Башлығы республиканың ошо башланғыстарҙы тормошҡа ашырыу буйынса әүҙем эш алып барыуын, шул иҫәптән федераль ярҙам йәлеп итеү йәһәтенән дә, һыҙыҡ өҫтөнә алды. Фото: glavarb.ru