Կառավարության նոյեմբերի 6-ի նիստում ՀՀ վարչապետ Նիկոլ Փաշինյանը հայտարարել էր, որ 2025 թվականի սեպտեմբերի դրությամբ՝ ՀՀ-ում 2118 ուսուցիչ ստանում է 300 000-400 000 դրամ, 863 ուսուցիչ՝ 400 000-500 000 դրամ, 109 ուսուցիչ՝ 500 000-600 000 դրամ, 22 ուսուցիչ՝ 600 000-700 000 դրամ և 2 ուսուցիչ՝ 700 000 դրամից բարձր վարձատրություն։
Այս հայտարարությունից հետո Armenia Today-ին դիմել էին ուսուցիչներ, որոնց պնդմամբ՝ «90% ատեստացիա են անցել, 4-րդ տարակարգ ունեն, բայց վարձատրությունը 450 000 դրամի էլ չի հասնում»։
Armenia Today-ը հարցում էր ուղարկել ԿԳՄՍ նախարարություն՝ պարզելու, թե ինչպես է գոյացել նշված ուսուցիչների վարձատրության չափը։
Նախարարությունից հայտնել են, որ 700 000 դրամ վարձատրություն ստացող երկու ուսուցիչներն էլ դասավանդում են «Ինֆորմատիկա» առարկա: Նրանք կամավոր ատեստավորման արդյունքում ցուցաբերել են 90-100% արդյունք, ունեն 4-րդ աստիճանի տարակարգ: Բացի այդ՝ նախարարությունից հայտնել են, որ նրանք ստանում են 25% ԲՏՃՄ լրավճար («Աշխարհագրություն», «Բնագիտություն», «Կենսաբանություն», «Քիմիա», «Ֆիզիկա», «Ինֆորմատիկա» առարկաներ) և աշխատում են առավելագույն ծանրաբեռնվածությամբ: Նույն մեխանիզմը գործում է նաև 600-700 հազար դրամ ստացող ուսուցիչների համար, պարզաբանել է ԿԳՄՍՆ-ն։
Մեր խնդրանքով նախարարությունից հստակեցրել են նաև, թե ինչպես է ձևավորվում ուսուցիչների աշխատավարձը։ Ըստ գերատեսչության՝ դա պայմանավորված է նրանց ծանրաբեռնվածությամբ և մասնագիտական զարգացման ու խրախուսման մի շարք ծրագրերով։ Դրանք են ուսուցիչների կամավոր ատեստավորումը, տարակարգի 1-4-րդ աստիճանի շնորհումը (30-50% հավելավճար), ԲՏՃՄ առարկաներ դասավանդող ուսուցիչների խրախուսումը (25% հավելավճար) և գյուղական բնակավայրերում մինչև 100 սովորող ունեցող դպրոցների ուսուցիչների լրավճարների տրամադրումը:
ԿԳՄՍ նախարար Ժաննա Անդրեասյանը 2 տարի առաջ հայտարարել էր, որ բարձրացված վարձատրությունը ներառում է 200 հազար դրամ դրույքաչափը և 30-50 տոկոս հավելավճարը կամավոր ատեստավորման համար։ ՀՀ վարչապետ Նիկոլ Փաշինյանը հայտարարել էր, որ որոշակի փուլից ատեստավորում չանցած ուսուցիչները այլևս դպրոցում աշխատելու հնարավորություն չեն ունենա։
Արաքսյա Սնխչյան
Նորություններին հետևեք մեր կայքում, ինչպես նաև Telegram-ում և YouTube-ում