“Хәйерле сәғәттә” тип яңы ағым уҡыу башланы

Башҡортостанда Рәсәй халыҡ хужалығы ойошмалары өсөн идара итеү кадрҙарын әҙерләү буйынса президент программаһының сираттағы, 28-се йыйылмаһы уҡыу башланы. Быйыл унда рекордлы һанда студенттар уҡый – 86 кеше. Уларҙы Өфөнөң алдынғы уҡыу йорттары – Башҡортостан Башлығы ҡарамағындағы Башҡортостан дәүләт хеҙмәте һәм идара итеү академияһы менән Өфө фән һәм технологиялар университеты уҡытасаҡ. Белем биреү ике йүнәлеш – инновацион һәм стратегик менеджмент буйынса алып барыласаҡ. Бөгөн Башҡортостан Башлығы ҡарамағындағы Башҡортостан дәүләт хеҙмәте һәм идара итеү академияһында яңы уҡыуҙы асыу тантанаһы булды. Академия ректоры вазифаһын башҡарыусы Азат Бадранов аңлатыуынса, 2010 йылға тиклем президент программаһы буйынса идарасыларҙы республиканың өс юғары уҡыу йорто уҡытҡан, бөгөн үрҙә телгә алынған ике вуз ҡалған. Программаны тормошҡа ашырыуҙың 28 йылында Башҡортостанда 2155 етәксе белем алған, шуларҙың 610-ы Европа, Көнсығыш һәм Урта Азия һәм Яҡын Көнсығыш илдәрендә стажировка үткән. – Быйыл уҡырға ингән 86 кешенең 69-ы Башҡортостан дәүләт хеҙмәте һәм идара итеү академияһында уҡыясаҡ. Программа уникаль, өҫтәүенә, сығарылыш уҡыусыларының уҡыуҙан һуң ҡыҙыҡлы һәм бай ваҡиғалы тормошо барлыҡҡа килә, улар барыһы ла Ассоциацияға берләштерелә, унда улар яңы бәйләнештәр булдыра. Икенсенән, сығарылыш уҡыусыларының сит илдәрҙә стажировка үтеү мөмкинлеге бар, әле был башлыса Көньяҡ-Көнсығыш Азия. Бөгөн беҙ яңыларҙы сәләмләйбеҙ, ә сығарылыш уҡыусылары уларға үҙҙәренең тәжрибәһе тураһында һөйләйәсәк, – тине Азат Бадранов. Башҡортостанда сит ил стажировкалары буйынса ла, сығарылыш уҡыусылары Ассоциацияһының әүҙемлеге буйынса ла иң юғары күрһәткестәр. Башҡортостан йыл һайын сит ил етәкселәренең стажировкалары өсөн пилот майҙансығы сифатында өс-дүрт төбәк иҫәбендә һайлана, ә һуңғы йылдарҙа — төбәк-ара тармаҡ стажировкалары өсөн дә. “УИС МУП” ойошмаһының баш энергетигы Ирек Ғилманов уҡыуҙың “горизонталь бәйләнештәр” булдырыу кеүек яғын билдәләне: – Күп танышыуҙар барлыҡҡа килә, аралашыу даирәһе иҫ киткес үҫешә. Ошо көндәрҙә Мәскәүгә президент программаһын тамамлаусылар конференцияһына барҙым. Ә уҡыған саҡта Ҡытайҙа стажировка үттем. Йыш ҡына курсташтарыбыҙ менән аралашыу өсөн йыйылабыҙ, ҡайһы берҙә уларҙы үҙ эшебеҙ менән таныштырабыҙ. Мәҫәлән, күптән түгел Первушино аэродромында булдым, эштең нисек ойошторолғанын күрҙем. Мин дә ҡаҙанлыҡҡа экскурсия ойошторҙом. Һәр етәксе бындай курс үтһен ине, бик яҡшы тәжрибә аласаҡтар, – тине ул. Айрат Нурмөхәмәтов фотолары.