Кыргыз Республикасынын Министрлер Кабинетинин төрагасы Адылбек Касымалиев ЕБРР вице-президенти Маттео Патроне менен жолугушуп, энергетика, инфраструктура жана жеке секторду колдоо боюнча долбоорлорду талкуулады. ЕБРРдин мындан аркы өнөктөштүгүн бекемдөө жана артыкчылыктуу багыттар боюнча кызматташуу ниети белгиленди.
🇰🇬 Кыргыз Республикасынын Министрлер кабинетинин төрагасы Адылбек Касымалиев Европа реконструкция жана өнүктүрүү банкынын (ЕБРР) вице-президенти Маттео Патроне менен жолугушту.
🔋 Жолугушууда энергетика, инфраструктура жана жеке секторду колдоо сыяктуу негизги тармактарда эки тараптуу кызматташтык маселелери жана артыкчылыктуу долбоорлорду ишке ашыруу перспективалары талкууланды.
📈 Адылбек Касымалиев ЕБРРдин Кыргызстан үчүн ишенимдүү өнөктөш экенин жана өлкөнүн социалдык-экономикалык өнүгүүсүнө салым кошконун баса белгиледи. Учурдагы жылдын тогуз айында ИДП 10% өскөндүгүн жана 2030-жылга чейин ИДПнын көлөмүн 30 миллиард АКШ долларына жеткирүү максатын койгонун айтты.
🏗️ Улуттук өнүгүү программасынын негизги багыттары катары масштабдуу индустриялаштыруу, регионалдык хабды өнүктүрүү, айыл чарбасын колдоо, туризмди стимулдаштыруу жана жашыл энергетиканы артыкчылыктуу өнүктүрүү белгиленди.
🚆 Кытай – Кыргызстан – Өзбекстан стратегиялык темир жолунун курулушу жана Камбаратинская ГЭС-1 сыяктуу ири инфраструктуралык долбоорлор өзгөчө артыкчылыктуу деп табылды.
🤝 Маттео Патроне Кыргыз Республикасынын динамикалык экономикалык өнүгүүсүн жогору баалап, жетишилген көрсөткүчтөрдүн маанилүүлүгүн белгиледи. ЕБРРдин мындан ары да өнөктөштүктү чыңдоого жана Министрлер кабинетинин төрагасы белгилеген артыкчылыктуу багыттар боюнча кызматташууга кызыкдар экенин билдирди.
📜 Жолугушуунун жыйынтыгында тараптар белгиленген бардык багыттар боюнча өз ара аракеттенүүнү улантууну макулдашты.