“Оҙайлы һәм әүҙем тормош” (национальный проект “Продолжительная и активная жизнь”) милли проектын ғәмәлгә ашырыу һөҙөмтәһендә Туймазы районының Һайран ауылында модулле фельдшер-акушерлыҡ пункты асылды. Быға тиклем фельдшер-акушерлыҡ пункты 1966 йылда төҙөлгән бинала урынлашҡан булған, унда һыу тәьминәте һәм канализация булмаған. Яңы фельдшер-акушерлыҡ пункты халыҡҡа сифатлы медицина ярҙамы күрһәтеү һәм хеҙмәткәрҙәргә уңайлы эшләү өсөн бөтә кәрәкле ҡорамалдар менән йыһазландырылған. Бында фельдшер кабинеты, ҡаралыу, процедуралар бүлмәләре, пациенттар өсөн көтөү бүлмәһе, санузел, хеҙмәткәрҙәр өсөн бүлмәләр, медикаменттар һәм йыйыштырыу кәрәк-яраҡтарын һаҡлау урындары бар. Яңы фельдшер-акушерлыҡ пунктында беренсел медик-санитар ярҙамды 421 кеше, шул иҫәптән 55 бала йәшәгән Һайран һәм Үрнәк ауылдары халҡы аласаҡ. "Һанлы фельдшер-акушерлыҡ пункты" проекты ярҙамында хәҙер һанлы медицина хеҙмәттәренән файҙаланырға мөмкин. Фельдшерҙың дистанцияла ваҡытлыса эшкә яраҡһыҙлыҡ ҡағыҙын асыу, электрон рецепт яҙыу, ҙур учреждение табибы менән телемедицина консультацияһы үткәреү һәм медицина мәғлүмәттәрен икенсе учреждениеға - мәҫәлән, ЭКГ, Йөрәк-ҡан тамырҙары хәүефе менән идара итеү үҙәгенә ебәреү мөмкинлеге бар, тип хәбәр итә Башҡортостан Һаулыҡ һаҡлау министрлығының матбуғат хеҙмәте. "Оҙайлы һәм әүҙем тормош" милли проектының (нацпроект "Продолжительная и активная жизнь") төп маҡсаты - халыҡтың ғүмерен оҙайтыу. 2030 йылға уртаса ғүмер оҙонлоғон 78 арттырыу планы ҡуйылһа, 2036 йылға 81 йәшкә еткереү планлаштырыла. Милли проект ярҙамында медицина учреждениелары яңыртыла, реабилитация системаһы камиллаштырыла, милли тикшеренеү үҙәктәре селтәре үҫешә, һаулыҡ һаҡлауҙы һанлаштырыу эше алып барыла. Иҫегеҙгә төшөрәбеҙ, милли проекттар Рәсәй Президенты Владимир Путиндың ҡарары менән тормошҡа ашырыла. Фото: Башҡортостан Һаулыҡ һаҡлау министрлығы.