Радий Хәбиров: Үзбәкстан менән эште системалы нигеҙҙә төҙөнөк

Бөгөн Башҡортостан Башлығы Радий Хәбиров журналистар менән әңгәмәлә Рәсәй һәм Үзбәкстан төбәктәренең II советы майҙансығында эшләүгә йомғаҡ яһаны. Республика етәксеһе, атап әйткәндә, бер нисә перспективалы проект буйынса үзбәк партнерҙары менән өлгәшелгән килешеүҙәрҙе тормошҡа ашырыу барышы хаҡында һөйләне. – Беҙ беренсе йыл ғына әүҙем хеҙмәттәшлек итмәйбеҙ. Үзбәкстан менән эш системалы нигеҙҙә төҙөлә. Бөгөн мөһим осрашыуҙар, шул иҫәптән вице-премьер Жамшид Ходжаев һәм бер нисә өлкә хокимдары менән, үткәрелде. Алдан килешелгән бөтә нәмәне тикшерҙек, – тип билдәләне Радий Хәбиров. – Дөйөм алғанда, Үзбәкстан менән хеҙмәттәшлектең юл картаһында 90-дан ашыу пункт бар. Улар иҡтисадҡа һәм инвестицияларға, мәҙәни һәм гуманитар алмашыуға ҡағыла. Атап әйткәндә, Ташкент өлкәһендә берлектәге индустриаль парк булдырыу пландары ҡаралды. Мин вице-премьерҙан был эште әүҙемләштереүен һораным, сөнки беҙҙең яҡтан потенциаль резиденттар бар. Үзбәк инвесторҙары үҙ сиратында Башҡортостан биләмәһендә бер нисә ауыл хужалығы проектын тормошҡа ашырыу менән ҡыҙыҡһына. Шуға бәйле делегациялар менән алмашырға ниәтләйбеҙ. Йәғни хәрәкәт бара, был уҙған йыл менән сағыштырғанда 17 процентҡа артҡан тауар әйләнешенә лә йоғонто яһай. Башҡортостан Башлығы шулай уҡ Үзбәкстан менән гуманитар һәм хеҙмәттәшлекте үҫтереү йүнәлештәрен билдәләне. – Һис шикһеҙ, мәҙәни алмашыу йәһәтенән даими диалог алып барабыҙ. Мәҫәлән, Ҡарағалпаҡстанда күптән түгел беҙҙең башҡарыусы ZAINETDIN сығыш яһаны. Ә беҙгә “Көҙ романтикаһы” фестиваленә Ташкенттан йырсылар килде, – тине Радий Хәбиров. – Фәнни өлкәлә лә мөһим аҙымдар яһаныҡ. Бохарала беҙ донъя кимәлендәге Евразия фәнни-белем биреү үҙәгенең вәкиллеген астыҡ. Ғалимдарыбыҙ үзбәк коллегалары менән берлектә эшләй ала. Был бик мөһим. Иҡтисади проекттар менән бер рәттән бындай башланғыстар тулы һәм күп яҡлы хеҙмәттәшлек булдырырға мөмкинлек бирә. Фото: Башҡортостан Башлығы сайты.