"Ювелир" киләсәктә лә үҙен хәрби итеп күрә

МХО биләмәһенә командировка барышында сираттағы әңгәмәсемә: “Үҙегеҙ менән таныштырып үтегеҙ әле”, – тип мөрәжәғәт иткәс, хәрбиҙәрсә теүәллек һәм ҡәтғилек менән: “Рәсәй армияһының Запорожье йүнәлешендәге яугире “Ювелир”, – тип яуапланы. Марк 24 йәшлек Өфө егете икән. Дим биҫтәһендә тыуып үҫкән, шундағы 104-се мәктәпте тамамлаған. Ә инде үҙенсәлекле хәрби ҡушаматын МХО-ға тиклем ювелир компанияһында эшләүенә бәйләп һайлауын әйтте. Марктың махсус хәрби операцияға юлланыуы, дөрөҫөрәге хәрби тормошҡа аяҡ баҫыуы – үҙенсәлекле тарих. Ул тире ауырыуы менән сирләүе арҡаһында сроклы хеҙмәткә яраҡһыҙ тип табыла. Әммә егетте был өлкә һәр ваыт үҙенә тарта, шуға күрә хәрби контракт төҙөп, МХО-ға юлланыу мөмкинлеге тыуғас, һис икеләнмәйенсә, ҡарар ҡабул итә. – Сирем йоғошло түгел, йәғни эргә-тирәмдәгеләргә бер ҡурҡынысы ла юҡ. Ундай диагноз менән Рәсәй армияһына сроклы хеҙмәткә алыу тыйылған, шуға күрә әрмегә бара алманым, әммә һәр ваҡыт хәрби хеҙмәт тураһында хыялландым, – ти “Ювелир”. “Бындағы егеттәрҙең барыһы ла тигәндәй һалдат һурпаһы эсеп, аҙмы-күпме хәрби тәжрибә туплап килгән. Ә һиңә ауырға тура килмәнеме?” – тип һорайым. – Юҡ, мине рота командиры ҡаршы алып, ҡайҙа нимәнең нисек урынлашыуы, хәрби тормоштоң ҡағиҙәләре менән яҡындан таныштырҙы. Полигонда булып, атыу буйынса күнекмәләр алдым. Шулай уҡ һөжүм итеү буйынса ла ғәмәли тәжрибә тупланым. Һәр бурысҡа яуаплы ҡарап, ныҡлы әҙерләндем, шуға күрә бөгөн үҙемде әҙерлекле, тәжрибәле яугир тип әйтә алам, – тип яуапланы “Ювелир”. Командирҙары ла йәш яугирҙе тик яҡшы яҡтан ғына телгә алды, уның һәр хәрби заданиеға ҙур яуаплылыҡ менән ҡарауын билдәләне. Марк үҙе лә төплө белеме, уйлап эш итеүе менән айырылып тора. – Яугир өсөн төп кәрәкле өс сифат – ҡыйыулыҡ, ауырлыҡтарға бирешмәү һәм аҡыл. Әгәр, ҡарар ҡабул итеп, бында килгәнһең икән, ҡурҡмаҫҡа тейешһең, сөнки һиңә бик етди бурыстар йөкмәтелә, яуаплылыҡ һалына. Икенсе сиратта ныҡлыҡ, түҙемлек кәрәк. Өҫтөбөҙҙәге махсус кейем, хәрби ҡорал һәм кәрәк-яраҡ ҡына арыу уҡ ауырлыҡта. Бынан тыш, төрлө шарттарҙа ҡалырға тура килә. Әкренләп быларҙың барыһына ла өйрәнәһең. Аҡыл, уйлап эш итеү айырыуса мөһим. Хәл-торошто дөрөҫ баһалай белергә, ғауғаға бирелмәҫкә кәрәк, – ти йәш яугир. Ул үҙенең был аҙымды яһауына, йәғни хәрби контракт төҙөүенә һис тә үкенмәүе, киреүенсә, ғорур булыуы хаҡында ла ышаныслы итеп әйтте. “Атай-әсәйең ҡарарыңды нисек ҡабул итте?” – тип һорайым. – Әлбиттә, һәр ата-әсә балаһының һуғышҡа барыуына тәләктәшлек белдереп ултырмай. Был тәбиғи хәл. Мин уларға: “Беҙ бармаһаҡ, илде кем һаҡлар?” тинем. Һуғышты, илебеҙгә янаған хәүефте туҡтатырға тейешбеҙ. Кемгәлер былар яңғырауыҡлы һүҙҙәр булып тойолор, әммә мин ысынлап шулай уйлайым һәм ҡарарымдың дөрөҫлөгөнә тамсы ла шикләнмәйем. Эйәрер өсөн миҫалдар ҙа етерлек ине. Мәҫәлән, Ҡаһарманлыҡ ордены кавалеры Артур Ғәлиев – минең класташым. Уның батырлыҡтары тураһында күп яҙҙылар, үҙәк телеканалдарҙа ла күрһәттеләр. Мәктәптәге уҡытыусыларыбыҙ ҙа беҙҙе Тыуған илде яратырға өйрәтте, уны һаҡлау – ир-егеттең изге бурысы булыуын аңыбыҙға һеңдерҙе, – ти Марк. Әңгәмә барышында ул байтаҡ уҡытыусыларын исемләп иҫкә алды, уларға ихлас рәхмәтен белдерҙе. “Хәрби тормош кешене үҙгәртәме?” – тип һорайым яугирҙән. – Әлбиттә, үҙгәртә һәм тик яҡшы яҡҡа. Ул холоҡто нығыта, рухи ныҡлыҡ тәрбиәләй, үҙ-үҙеңә ышанысты арттыра. Һәр ир-егет әрме хеҙмәтен үтергә һәм кәрәк саҡта Тыуған илен һаҡларға әҙер булырға тейеш, тип һанайым. Киләсәктә лә үҙемде хәрби итеп күрәм, – тине ул ышаныслы итеп. Ҡыйыу йөрәкле, тәүәккәл егеттәргә именлек-һаулыҡ, яҡты хыялдарының, уй-ниәттәренең тормошҡа ашыуын теләп хушлаштым. В. УРАЗБАЕВ. Автор фотоһы.