“Түҙегеҙ, еңеүле көндәргә күп ҡалманы...”

Октябрьский ҡалаһынан Рауил – “Ровек”ҡа 37 йәш. Махсус хәрби операцияға өлөшләтә мобилизация буйынса килгән, әммә күпмелер хеҙмәт иткәндән һуң контракт төҙөргә ҡарар иткән. МХО-ға тиклем ҡалалағы заводта эшләгән. Ул – ике бала атаһы, улына – 15, ҡыҙына – 13 йәш. Бөгөн инде “Ровек” мотоуҡсылар взводы командиры урынбаҫары вазифаһын намыҫлы башҡара. – Беренсе оборона линияһын тотабыҙ, шуға күрә һәр ваҡыт хәрби әҙерлектә булырға тейешбеҙ. Тәүлек әйләнәһенә хәрби дежурлыҡ ойошторолған. Беҙҙең шарттарҙа илке-һалҡылыҡ бөтөнләй ярамай, һәр кем үҙенә ҡушылған эштең, бурыстың мөһимлеген аңлай. Күберәк пилотһыҙ осоу аппараттары ярҙамында разведка эшен алып барабыҙ. Дошман дрондары ла ныҡ күп оса. Уларҙы ваҡытында күреп, юҡ итеү ҙә төп бурыстарҙан һанала. Һуңғы ваҡытта тыныс халыҡ йәшәгән урындарға, айырыуса граждандарҙың транспорттарына һөжүм итеү осраҡтары йышайҙы. Үҙҙәренсә ғауға, паника ойошторорға теләйҙәр, күрәһең. Әммә беҙ быға юл ҡуймаҫҡа тырышабыҙ. Урындағы халыҡ та беҙгә ышана, – тип һөйләне сержант “Ровек”. Өлөшләтә мобилизация буйынса Октябрьский ҡалаһы хәрби комиссариаты аша МХО-ға юлланған егеттәр ике ротаға берләшкән. Бөгөн инде улар ҡатмарлы шарттарҙа һыналған яҡын дуҫтарға әйләнгән. – Хәрби тормош кешене үҙгәртә, берҙәмлек, иптәшлек тойғоһо ныҡ көсәйә. Шунһыҙ булмай, сөнки һәр ваҡыт бер-береңә иңеңде ҡуйырға, ярҙам итергә тейешһең. Тыныс тормошта иркенлеккә өйрәнгән йәштәр ҙә бындағы тәртиптәр тәьҫирендә яҡшы яҡҡа үҙгәрә. Барыбыҙ ҙа ҡайҙа һәм ни өсөн килеүебеҙҙе аңлайбыҙ. Бойороҡ бирелгән икән, ул үтәлергә тейеш, – ти взвод командиры урынбаҫары. – Әлбиттә, һалдат та – кеше, ул да арый. Әммә беҙ, тәү сиратта, үҙебеҙҙең Ватан һаҡсыһы икәнебеҙҙе онотмайбыҙ. “Ровек” үҙенең улын да ошо принциптарҙа тәрбиәләй. “Ысын ир-егет үҫә, тип ышанам”, – ти ул уның тураһында. Балалары, әлбиттә, аталарының ниндәй мөһим бурыс башҡарыуын, һәр минутта хәүеф һағалаған шарттарҙа хеҙмәт итеүен яҡшы аңлай. Барлыҡ яугирҙәр кеүек Рауил дә ҡыҫҡа ваҡытлы ялының һәр көнөн ғаиләһе менән иҫтә ҡалырлыҡ итеп үткәрергә тырыша. Киләсәккә лә матур уй-ниәттәр ҡороп йәшәй яугир. Октябрьский ҡалаһындағы төҙөлөш колледжына ситтән тороп уҡырға ингән. Артабан юғары белем алыу тураһында ла уйлана. – Өс йылдан ашыу хеҙмәт осоронда байтаҡ тәжрибә тупланым, киләсәктә ул тыныс тормошта ла кәрәк булыр, тейешле йүнәлештә файҙалана алырмын, тип уйлайым, – ти ул. “Ровек” яҡташтарына – Октябрьский ҡалаһы халҡына ихлас сәләмдәрен һәм рәхмәт һүҙҙәрен тапшырыуҙы һораны. Яугирҙәр айырыуса “Оберег” ойошмаһы ирекмәндәренә рәхмәтле. Улар дарыуҙар, көнкүрештә кәрәкле эш ҡоралдары һәм башҡа әйберҙәр ебәреп тора. Оло йәштәге апай-инәйҙәр даими рәүештә маскировкалау селтәрҙәре үрә. – Ялға ҡайтҡан саҡта улар янына инеп, рәхмәт һүҙҙәремде әйтеп сығам. Шул тиклем афариндар, еңеүҙе яҡынайтыу өсөн ал-ял белмәй тырышалар. Түҙегеҙ, еңеүле көндәргә күп ҡалмағандыр, тип ышанабыҙ. Һеҙҙең ярҙамығыҙ һәм ошо ышаныс беҙҙе алға әйҙәй, – тип тамамланы һүҙен “Ровек”. Мәҡәләнең авторы - В. УРАЗБАЕВ. Автор фотоһы.