Башҡортостан эшҡыуары программалау мәктәптәре селтәрен киңәйткән.

Башҡортостан эшҡыуары «Минең бизнесым» үҙәге ярҙамында программалау мәктәптәре селтәрен киңәйтте. Стәрлетамаҡтан социаль эшҡыуар Оксана Желтоухова ҡалала IT-мәктәптәр селтәрен уңышлы үҫтерә. Бизнесты масштаблауҙа төп ролде дәүләт ярҙамы уйнаны. «Минең бизнесым» үҙәгенең урындағы филиалы белгестәре эшҡыуарға социаль предприятиелар реестрына индереү өсөн документтар пакетын йыйырға ярҙам итте, был артабанғы үҫеш өсөн мөһим аҙым булды. Был сара «Һөҙөмтәле һәм конкурентлы иҡтисад» (национальный проект “Эффективная и конкурентная экономика”) милли проекты сиктәрендә тормошҡа ашырылған. - Социаль әһәмиәтле проекттарҙы үҫтереү республика өсөн өҫтөнлөклө йүнәлеш булып тора. Социаль эшҡыуар статусын формалаштырыуҙа ваҡытында ярҙам төбәктә белем биреү сифатын күтәреү һәм үҫтереү өсөн яңы мөмкинлектәр асыуға булышлыҡ итә, - тип аңлатма бирҙе Башҡортостан Республикаһының Эшҡыуарлыҡ һәм туризм министры Светлана Верещагина. Оксана Желтоухова күп йылдар заводта йәмәғәтселек менән бәйләнештәр буйынса бүлек етәксеһе булып эшләй. Карьераһының тотороҡло булыуына ҡарамаҫтан, ул үҙгәрештәргә мохтаж булыуын тоя һәм йәмғиәт өсөн файҙалы бизнес асыу тураһында хыяллана. Оксана үҙ бизнесының табышлы ғына түгел, ә социаль әһәмиәтле лә булырға тейешлеген яҡшы аңлай. Стәрлетамаҡта беренсе мәктәп асылғандан һуң ул «Минең бизнесым» үҙәгенә мөрәжәғәт итте, унда уға социаль предприятие статусын алыуға заявка бирергә ярҙам итәләр. Эшҡыуар Салауатта һәм Ишембайҙа икенсе һәм өсөнсө филиалдарын асып, өлгәшелгәндәрҙә туҡтап ҡалмай. 2025 йылдың авгусында Оксана йәнә «Минең бизнесым» үҙәге филиалына мөрәжәғәт итә, унда офис етәксеһе Татьяна Полушкина уға социаль эшҡыуарҙар өсөн финанс ярҙамы алырға ярҙам күрһәтә. Был аҡсалар дүртенсе филиалды асыу өсөн этәргес була, ул тағы ла күберәк балаларға сифатлы белем алыу мөмкинлеге тыуҙыра. Рәсәй Президенты Владимир Путиндың ҡарарына ярашлы, яңыртылған милли проекттар 2025 йылдан алып тормошҡа ашырыла. Фото: БР Хөкүмәте сайтынан