Ошо көндәрҙә Өфөлә ҡот осҡос авария булды. Ҙур тиҙлектә килгән Shacman Ҡытай йөк машинаһының тормоздары эшләмәй башлай һәм ул бер юлы 12 машинаны бәрҙерә. Һөҙөмтәлә алты кеше йәрәхәттәр ала, икәү урында йән бирә. Һәләк булған кешеләрҙе ҡотҡарыусылар саҡ һөйрәп сығара һәм уларҙың кемлеге асыҡлана. Баҡһаң, авариянан иң нығы Chevrolet Lanos маркалы такси машинаһы зыян күрә. Йөк машинаһы уны алдынан бер нисә метр этеп килтерә һәм юлдан үтеп барған фураға ҡуша бәрә. Унда водитель һәм 47 йәшлек Гүзәл исемле ҡатын ултырған була. Көслө бәрелештән һуң Гүзәл машинанан сығып оса, ә водитель тимер өйөмө араһында ҡыҫылып ҡала. Уларҙың икеһенең дә был аварияла тере ҡалыуға бер генә лә мөмкинлеге булмай. Фажиғә көнөндә Гүзәл эшкә китеп барған була. Уның төҙөлөш материалдары һатҡан компанияла эшләүе билдәле. Ғәҙәттә, уны фирма водителе йөрөткән, тик ул көндө килеп сыҡмай һәм ҡатын такси саҡырта. Ул эшенә тиклем бер нисә йөҙ метр ғына барып етә алмай ҡала. Тап бер айҙан уға 48 йәш тулырға тейеш булған. Яҡындары әйтеүенсә, уның Мәскәүҙә йәшәгән ҙур улы һәм ете йәшлек ейәне бар. Әсәһенең һәләк булыуы тураһында ишетеү менән улы тәүге самолет менән Өфөгә ҡайтҡан. – Ул ихлас, изге күңелле, ташып торған энергиялы кеше ине. Сентябрҙә генә әхирәттәре менән Төркиәлә ял итеп ҡайтты. Быға тиклем сит илгә сыға алмай ине, сөнки ата-әсәһенән ҡалған фатир өсөн түләне. Унда бер үҙе йәшәй ине, – тип һөйләгәндәр туғандары. Әйткәндәй, ял иткән саҡта буласаҡ фажиғәне күҙаллаған осраҡ булған. Ҡатындар үҙҙәре менән китап алып барған һәм уның буйынса киләсәктәрен юраған. Һәр береһе китаптың битен, юлын әйтә һәм унда йәнәһе киләсәктә нимә көтөлгәне яҙылған була. – Гүзәл өс тапҡыр бит һанын әйтә, тик улар өс тапҡырында ла буш булып сыға. Ул быны көлөп, тимәк тормошомдо яңы биттән башлайым тип юрай. Тик былай килеп сығыр тип бер кем дә уйламаған... – ти әхирәттәре. Аварияны ойошторған водителгә килгәндә, ул 27 йәшлек Үзбәкстан кешеһе. Әле ул үҙе дауаханала ята. Мәғлүмәттәр буйынса, уның Рәсәй водитель танытмаһы һәм йөк машинаһында эшләү өсөн рөхсәте булмаған. Хәле уртаса ауырлыҡта тип баһалана, дауахананан сығыу менән суд уның яҙмышын хәл итәсәк. Әле уға ҡарата енәйәт эше ҡуҙғатылған һәм тикшерелә. Хоҡуҡ һаҡлау органдары йөк машинаһы водителе эшләгән предприятиены ла тикшерәсәк. Әлегә был юл-транспорт ваҡиғаһы сәбәбенең төп версияһы – тормоздарҙың эшләмәүе. Моғайын, машинаны тейешле техник тикшереүһеҙ юлға сығарғандар. Сығанаҡ: "КП-Өфө".