“Кем уйлаған, был хәтле балаға ата-әсә булырбыҙ, тип...”

Бәләбәй районының Баймырҙа ауылында йәшәгән күп бала әсәһе Алена үҙенең бик бәхетле булыуын йәшермәй. “Мин бер ваҡытта ла ҙур ғаилә тураһында хыялланманым. Яратҡан кешем менән тормош ҡороп, тыныс ҡына ял итеп, ғаилә байрамдары ойоштороп, рәхәтләнеп йәшәп ятырбыҙ кеүек ине. Тик яҙмыштың үҙ планы булған...” - тип йылмая әсә. Әсә булыу бәхетен бер ни менән сағыштырырлыҡ түгел, ти ул. Йоҡоһоҙ төндәр, борсолоуҙар, яуаплылыҡ, ал-ялһыҙ хеҙмәт менән үткән йылдар һиҙелмәй үтә лә китә. Өфөлә тыуып үҫкән ҡыҙ 2-се ҡала һөнәрселек училищеһында токарлыҡҡа уҡый. “Ни өсөн ир-ат һөнәрен һайланың, тип аптырайһығыҙҙыр. Тегенселәр төркөмө тулы булғас, тоттом да ҡайҙа урын бар, шунда уҡырға йүнәлдем”, – ти ҡырҡ йәшлек ҡатын. Ҡыҙ Бүздәк районында йәшәгән өләсәһенә ҡунаҡҡа барғанда йәш фельдшер Марсель Зыязетдинов менән таныша. Йәштәр 2003 йылда өйләнешә, бер йылдан улдары Алмас донъяға килә. Бер-бер артлы тыуған Аделина, Марат, Элина йортто йәмгә, күңелле бала тауыштарына күмә. Ғаилә бер ни тиклем Баҡалы районында йәшәй. 2018 йылда Марсель Зыязетдинов “Ауыл табибы” программаһы буйынса Баймырҙа ауылына эшкә килергә ҡарар итә. Ғаилә йорт һатып алып, уны йылылыҡ һәм татыулыҡ йәшәгән ожмах мөйөшөнә әүерелдерә. Төпсөк ҡыҙҙары Алина ошо матур йортта донъяға килә. Ғаилә башлығы Марсель Тәлғәт улы ауылдың 200-ҙән ашыу кешеһе сәләмәтлеген хәстәрләй, аҙнаһына бер тапҡыр Ыҫлаҡбашта пациенттарҙы ҡабул итә, ял көндәрендә ашығыс медицина ярҙамы бүлексәһендә эшләй. Ҡатыны Алена Александровна фельдшер-акушерлыҡ пунктында таҙалыҡ һәм тәртипте күҙәтә һәм социаль хеҙмәткәр булараҡ мохтаж ғаиләләргә ярҙам итә. Балалары ҡул суғындағы бармаҡтар кеүек бишәү, һәр береһе үҙ холҡо, хыялдары һәм ынтылыштары менән. Әммә барыһы ла бер еп – ата-әсә һөйөүе менән ныҡлы бәйләнгән. Өлкән улдары Бәләбәй гуманитар-техник колледжын тамамлап, иретеп йәбештереүсе һөнәрен алды, армия хеҙмәтендә булды. Һеңлеһе менән ҡустыһы ла ошо уҡыу йортонда белем ала. Аделина башланғыс кластар педагогы буласаҡ. Марат машиналар төҙөүсе һөнәрен һайлаған. Аделина – мәктәпкә, биш йәшлек Алина балалар баҡсаһына йөрөй. Татыулыҡ ауырлыҡтарҙы еңеп сығырға, үҙ-ара мөнәсәбәттәрҙе нығытырға ярҙам итә. Бергәләп хужалыҡ тоталар, балаларын хеҙмәткә күнектереп үҫтерәләр. Ял етеү менән йортҡа бына тағы студенттар йыйыласаҡ, шатлыҡ һәм фекерҙәр менән уртаҡлашыу, күңел асыу һәм пландар менән бүлешеү башланасаҡ. “Үҙ-ара аралашҡанда ғына дөрөҫ ҡарарға килергә мөмкин”, тип иҫәпләй күп бала тәрбиәләгән ата-әсә. Елена Петрова фотолары.