ВАҚТ

ВАҚТ

Дунёга келдиму шудир билганим,

Бир нафас тинмадим унинг дастидан,

Капалак қувлаган бола сингари,

Қувиб боравердим вақтнинг ортидан.

Лаҳзалар шошилди, ҳафталар чопди,

Йиллар кесиб ўтди босган изимни.

Нимани бой бердим, нимани топдим,

Ниҳоят йўқотиб қўйдим ўзимни.

Билмадим қанча вақт турдим кафтида,

Елларга айланиб елиб-югурдим.

Кўклам бўлмоқчийдим унинг бағрида,

Қовжираган япроқ бўлиб улгурдим.

Юрагимда ёнган кузнинг ўтимас,

Ўтган лаҳзаларнинг армонин ҳисси.

Бағримда гулларнинг аччиқ ҳидимас,

Хушбўй хазонларнинг ёқимли иси.

✍️Ойгул Асилбек қизи

Каналимизга обуна бўлинг ва энг сўнгги янгиликларни кузатиб боринг

Jizzaxnews |Тelegram  | Facebook | Dzen | YouTubе