Яңы троллейбустар Өфөнөң ҡайһы маршруттары буйлап йөрөр?

11 октябрҙә Республика йорто алдындағы майҙанда Башҡортостан Башлығы Радий Хәбиров Өфөнөң транспорт инфраструктураһы идаралығына “Горожанин” маркалы 10 троллейбус асҡыстарын тапшырҙы. Өфө трамвай-троллейбус заводы тарафынан Минск автозавод кооперацияһында сығарылған техника ҡала электр транспорты үҫеше буйынса программаға ярашлы һатып алынған. - Электр транспортын яңыртыу тураһында ҡарар ҡабул иткән өсөн Өфө мэрияһына рәхмәт, - тине төбәк етәксеһе. – Беҙ артабан да Белоруссия партнерҙары менән кооперациябыҙҙы көсәйтәсәкбеҙ. Беҙҙең водителдәргә лә ихлас рәхмәт һүҙҙәре белдерәм. Хеҙмәтегеҙ еңел түгел, ләкин бик мөһим. Яңы транспортта һеҙгә – эшләүе, пассажирҙарға йөрөүе уңайлы булыр, тип ышанам. Барығыҙҙы ла Республика көнө менән ҡотлайым! Һаулыҡ һәм именлек теләйем. “Горожанин”дың үҙенсәлектәренең береһе – өҫтәмә аккумулятор иҫәбенә, контакт селтәргә тоташмайынса ла, уның 30 километрға тиклем араға автономлы хәрәкәт итеү мөмкинлеге бар. Машинаның опциялары исемлегендә – пассажирҙарға мәғлүмәт еткереү системаһы, кондиционер, тышҡы һәм эске видеокүҙәтеү камералары, электрон гаджеттар өсөн USB–зарядкалар, шулай уҡ һаулыҡ мөмкинлеге сиклеләр өсөн ҡорамалдар бар. Өфө хакимиәте башлығы Радмир Мәүлиев троллейбустарҙың һорау менән файҙаланылған маршруттарға сығасағын билдәләне. Улар – ҡаланың көньяҡ һәм төньяҡ өлөшөндәге 4, 9, 10, 13, 15, 16, 18, 21 һәм 22-се маршруттар. 2021 йылдан алып 2024 йылға тиклем республикабыҙ баш ҡалаһы 34 яңы троллейбус алған. Быйыл йыл аҙағына тиклем тағы ла бишәү көтөлә. Радий Хәбиров “УТТЗ-6243” троллейбусының үҙенсәлектәре менән танышты. Ул – күп кеше һыйҙырышлы, түбән иҙәнле модель. Бындай троллейбус пассажирҙар күп булған ҙур ҡалаларға тәғәйенләнгән. - Өфөнөң транспорт инфраструктураһында муниципаль предприятие планлы рәүештә үҫешә. Бында автопаркты яңырттылар, артабан да техника алыу планлаштырыла. Троллейбус водителдәренә эш хаҡын күтәрә башлауҙары ла бик яҡшы, - тине республика Башлығы журналистар менән әңгәмә барышында. – Был троллейбустарҙы Өфө предприятиеһы етештереүе лә бик мөһим. Белорустар менән кооперация яҡшы һөҙөмтә бирә. Фото: Башҡортостан Башлығы сайтынан.