Хеҙмәт династиялары, үҙ эшенең оҫталары наградланды

Бөгөн, Республика көнө алдынан, Өфөлә Радий Хәбиров лайыҡлыларға Рәсәйҙең һәм Башҡортостандың дәүләт наградаларын тапшырҙы. Тәбрикләү һүҙендә республика етәксеһе, был залда республикабыҙҙың затлы шәхестәре, үҙ хеҙмәте менән Башҡортостандың бөгөнгө тарихын яҙыусылар йыйылды, тип билдәләне. – Һеҙҙең арағыҙҙа төрлө һөнәр вәкилдәре – етәкселәре һәм хеҙмәткәрҙәр, ауыл хужалығы хеҙмәтсәндәре, табиптар, педагогтар, дәүләт һәм муниципаль хеҙмәткәрҙәр, ғалимдар, мәҙәниәт эшмәкәрҙәре, журналистар һәм башҡалар бар. Айырыуса республика хеҙмәт династиялары конкурсы еңеүселәрен ҡотларға теләйем. Һеҙҙең һоҡланғыс ғаиләләрҙә һөнәреңә һөйөү, бурысҡа тоғролоҡ быуындан-быуынға тапшырылып килә. Бөгөн беҙ махсус хәрби операция бурыстарын хәл итеү, яугирҙәребеҙ һәм уларҙың ғаиләләренә ярҙам итеү өсөн барыһын да эшләйбеҙ. Иҡтисадты һәм социаль өлкәне нығытабыҙ. Сәнәғәтселәребеҙҙең һәм, ҡатмарлы һауа шарттарына ҡарамаҫтан, яҡшы уңыш алған аграрийҙарыбыҙҙың юғары һөҙөмтәләре менән ғорурланабыҙ. Быйыл 3,8 миллион тоннаға яҡын иген йыйып алынған. Юлдар, күперҙәр төҙөйбөҙ, булғандарын киңәйтәбеҙ. Иртәгә баш ҡалабыҙ өсөн үтә мөһим булған тарихи аркалы күперҙе асабыҙ. Рекордлы күләмдә торлаҡ төҙөйбөҙ. Спорт үҙәктәре, заманса дауаханалар төҙөйбөҙ. Ҡалаларыбыҙҙы һәм ауылдарыбыҙҙы матурлайбыҙ. Уңайлы мөхит булдырыу буйынса конкурста еңеүселәр һаны буйынса илдә дүртенсе урында торабыҙ. Быларҙың барыһын да төп маҡсатыбыҙ – кешеләр етеш йәшәһен, балалар үҫтерһен, киләсәккә өмөт менән ҡараһын өсөн эшләйбеҙ, – тине Радий Хәбиров. БР Башлығы ҡайһы бер наградланыусылар тураһында айырым һөйләп китте. “Залда ултырғандарҙың һәр ҡайһыһы – республикабыҙ ғорурлығы һәм йәштәребеҙ өсөн иң яҡшы өлгө”, – тине ул. Бүләкләнеүселәргә күп йыллыҡ тырыш хеҙмәттәре өсөн рәхмәт белдерҙе. “Һеҙҙең менән ихлас ғорурланабыҙ. Бөтәгеҙгә лә ныҡлы һаулыҡ, имен тормош, тыныслыҡ һәм изгелек теләйем” ,– тип йомғаҡланы һүҙен республика етәксеһе. Бөгөнгө бүләкләү тантанаһында үтә тулҡынландырғыс мәл дә булды. Наградланыусылар араһында МХО-ла батырҙарса һәләк булған Альберт Фәрит улы Төхвәтшиндең ғаиләһе бар ине – үҙе үлгәндән һуң лайыҡ булған генерал Шайморатов орденын республика етәксеһе уның ҡатыны Айгөл Аданис ҡыҙына тапшырҙы. Зал ҡаһарман яугирҙең ике улын һәм ҡатынын аяғөҫтә алҡышланы, рәхмәт тойғоһо күҙҙәргә йәш булып төйөлдө. “Хөрмәтле Айгөл Аданис ҡыҙы! Һеҙҙең тәрән ҡайғығыҙҙы уртаҡлашабыҙ. Һәләк булған бер геройҙың ғаиләһе лә иғтибарһыҙ, хәстәрлекһеҙ ҡалмаҫ. Улар хаҡында иҫтәлек беҙҙең йөрәктәрҙә мәңге һаҡланыр”, – тине Радий Фәрит улы. Илебеҙҙең дәүләт наградаларын алыусылар араһында беҙҙең коллегалар – “Өмөт” гәзитенең баш мөхәррире Рәдис Ноғоманов һәм “Башиформ” агентлығының әҙәби мөхәррире Алик Шакиров бар. Улар “Рәсәй Федерацияһының атҡаҙанған журналисы” исеменә лайыҡ булды. Ихлас ҡотлайбыҙ! Рәүилә Ғатауллина. Альберт Заһиров фотолары.