Башҡортостанда “Экологик именлек” милли проектының (национальный проект “Экологическое благополучие”) “Урмандарҙы һаҡлау” федераль проекты маҡсаттарына ярашлы ойошторолған “Урманды һаҡлайыҡ” бөтә Рәсәй акцияһы сиктәрендә ағастар ултыртыу буйынса саралар дауам итә. Был хаҡта республиканың Урман хужалығы министрлығынан хәбәр иттеләр. Мәҫәлән, Учалы урмансылары асыҡ һәм ябыҡ тамыр системалы 8 мең ҡарағас һәм ҡарағай үҫентеләрен ултыртҡан. Экологик башланғысҡа Сәфәр һәм Учалы ауыл советтары хеҙмәткәрҙәре, шулай уҡ ирекмәндәр һәм урындағы халыҡ ҡушылған. Ҡалтасы районы урмансылары бер гектар майҙанда дүрт мең яңы ҡарағай ултыртҡан. Белорет урмансылығы һәм Әүжән урман хужалығы белгестәре “Урманды һаҡлайыҡ” акцияһы сиктәрендә ябай ҡарағай үҫентеләре ултыртыу иҫәбенә Белорет районының урман фондын арттырыуҙы тәьмин итеп, урманды тергеҙеү буйынса саралар комплексын үткәргән. Акцияла теләгән һәр кем ҡатнаша ала. Райондың урмансылыҡтарына һәм урман хужалыҡтарына мөрәжәғәт итегеҙ. Фото: Урман хужалығы министрлығы.