Үҙен башҡорт тип һанаған һәр кемдең башҡорт булырға хоҡуғы бар

Ошо көндәрҙә легендар AY YOLA төркөмө Рәсәй ҡалалары буйлап беренсе турына сыға һәм Ural Batyr альбомын тәҡдим итәсәк. Улар һеҙҙе, хөрмәтле тамашасылар, легенда рухын сәхнәлә бергә кисерер өсөн көтә. Шул уҡ ваҡытта AY YOLA төркөмө солисы Аделдең туған телен белеү-белмәүе буйынса бәхәстәр тынмай. Бөтә донъя башҡорттары ҡоролтайы Президиумы рәйесе, Рәсәй Федерацияһының Дәүләт Думаһы депутаты Эльвира Ринат ҡыҙы АЙЫТҠОЛОВА был хаҡта түбәндәге фекерен белдерҙе: "Феноменаль "Һомай" йыры барлыҡҡа килгән тәүге көндән алып туған телдең таҙалығы тураһында бәхәстәр тынмай кеүек. Төркөмдөң солисы менән килешәм, саф әҙәби һөйләште яратыусылар бик бәхетле: улар башҡорт телле мөхиттә тыуған һәм йәшәгән, туған телдә уҡыған. Әммә шарттар төрлө һәм күптәр телде күпкә һуңыраҡ үҙләштерергә мәжбүр, әммә был уларҙың башҡорт халҡының бер өлөшө булыу мөмкинлеген һис кәметмәй. Әйҙәгеҙ халыҡты төрлө билдәләр буйынса “ысын башҡорт” ҡалыбына тап килмәгәндәргә бүлеүҙе туҡтатайыҡ. Ваҡытында халҡыбыҙға мөрәжәғәт итеп, республика Башлығы Радий Хәбиров билдәләүенсә, үҙен башҡорт тип һанаған һәр кем башҡорт булырға хоҡуҡлы. Туған телдәребеҙҙе яратайыҡ, өйрәнәйек, үҫтерәйек, күп милләтле илебеҙҙә телдәр төрлөлөгөн һаҡлап ҡалыу өсөн барыһын да эшләргә тырышайыҡ. AY YOLA төркөмө самими ижады менән меңәрләгән кешене башҡорт телен өйрәнергә рухландырҙы һәм, һис шикһеҙ, был бик шәп! Бының өсөн уларға ҙур рәхмәт! Бөтә донъя беҙҙең телдең моңло яңғырашын ишетте, белде. Һәм Аделдең сығышын тыңлап, күптәр, телмәр хаталарынан тартыныуҙан туҡтаны һәм башҡорт телендә йышыраҡ һөйләшә башланы, ә телде өйрәнеүҙә, тәүге сиратта, практика кәрәк. Ошо көндәрҙә AY YOLA илебеҙ ҡалалары буйлап гастролгә сыға, һәр ҡалала уларҙы урындағы башҡорттар ҡоролтайы әүҙемселәре көтәсәк. Телмәрҙе камиллаштырыуға был тағы бер форсат! Алға, AY YOLA!”