Асенняй парой у сельгаспрадпрыемствах усе сілы накіроўваюцца не толькі на ворыва, падрыхтоўку глебы да сяўбы і непасрэдна на сяўбу азімых культур, але яшчэ і на заканчэнне ўборкі кукурузы – не толькі на сілас, але і на зерне. Гэтай работай і займаюцца апошнімі днямі ў ААТ "Капыльскае".
Але ж для таго, каб добра працаваць, трэба як мае быць падсілкавацца. У сельгаспрадпрыемстве пра гэта клапоцяцца ў мясцовай сталовай. Заўсёды смачна гатуюць абеды загадчыца Наталля Крэпская і повар Ірына Каціла.
У народзе кажуць, што ўвосень – работ восем. Гэта прымаўка найлепш адносіцца да галіны сельскай гаспадаркі. Хоць і прынята самай гарачай парой лічыць жніво, аднак нарыхтоўка кармоў, якая пачынаецца яшчэ ў чэрвені і заканчваецца, можна сказаць, з першым снегам, – кампанія не менш адказная і напружаная.
Дарэчы, сёлетняя ўборачная кампанія збожжавых і зернебабовых культур у ААТ "Капыльскае" прайшла паспяхова: намалацілі амаль 19 тысяч тон збожжа. На круг атрымалася больш чым 60 ц/га. Парадаваў рапс, ураджайнасць якога склала 52 ц/га. Само жніво прайшло без надзвычайных сітуацый, зладжана і арганізавана. На высокім узроўні была падрыхтавана тэхніка, якая не падводзіла ў гэты напружаны час. Увогуле працаваць якасна – фірменны стыль сельгаспрадпрыемства.
Асаблівы гонар гаспадаркі – кукуруза. Дырэктар таварыства Сяргей Мацюшэнка падкрэслівае: на палях сельгаспрадпрыемства "царыца палёў" урадзіла сапраўды па-царску. З дзвюх тысяч гектараў, што былі адведзены на сілас і зялёны корм, пры ўраджайнасці болей за 300 цэнтнераў на круг закладваюць у траншэі высакаякасны корм. Будзе што жывёле ўзімку есці! Звыш 900 гектараў пакінулі на зерне, якое ўжо таксама пачалі ўбіраць.
Працэс нарыхтоўкі корму распланаваны такім чынам, каб ад месца ўборкі сельгаскультуры і да месца яе закладкі ў траншэю быў максімальна кароткі шлях. Гэта дазваляе скараціць час на перавозку зялёнай масы і, што немалаважна, закласці яму і закансерваваць яе за два-тры дні, як патрабуе тэхналогія. Закладка вядзецца пад пільнай увагай адказных спецыялістаў, якія кантралююць, каб траншэі былі запоўнены якаснымі кармамі.
Для таго, каб кансервацыя сіласнай масы была з максімальным захоўваннем пажыўнасці корму, кукуруза павінна быць правільна здробнена, менавіта таму яе ўборку даверылі вопытнаму механізатару Сяргею Гуліцкаму і перспектыўнаму маладому Аляксею Ермалінскаму, які ўжо амаль два гады працуе ў гаспадарцы. З раніцы і да змяркання яны бесперапынна напаўняюць кузавы аўтамабіляў, задзейнічаных на адвозцы.
Немалаважную ролю, а дзесьці і галоўную, у атрыманні якасных кармоў адыгрывае якасць трамбоўкі масы. Памылкі пры трамбоўцы здольныя загубіць працу многіх механізатараў: пачынаючы ад тых, хто ўзворваў і рыхтаваў глебу, вёў сяўбу "царыцы палёў", і завяршаючы тымі, хто зараз займаецца яе ўборкай і перавозкай. Таму на трамбоўцы самыя адказныя працаўнікі – Аляксандр Шчарбінскі, Мікалай Стружко і Аляксандр Чаюк-старэйшы, а яго сын Аляксандр займаецца ўборкай кукрузы на зерне.
Кіпіць работа на палетках з цукровымі буракамі – важнай культурай, якая дае сыравіну для цукровай прамысловасці краіны. Тэхналогія вырошчвання салодкіх каранёў толькі на першы погляд здаецца нескладанай: падрыхтоўка глебы, сяўба, апрацоўка ад пустазелля і шкоднікаў, уборка. Але для таго, каб атрымаць добры ўраджай, неабходны строгае захаванне тэхналогіі, пастаянны клопат і штодзённая напружаная праца. Немалаважнае значэнне маюць і ўмовы надвор’я: культура вельмі патрабавальная да святла, вільгаці і цяпла.
У ААТ "Капыльскае" салодкімі караняплодамі занята 1100 гектараў, звыш паловы ўжо выкапана, ураджайнасць складае звыш 500 ц/га. На перапрацоўку адпраўлена больш чым 2000 тон.
Кіпіць работа і на кухні, дзе гатуюць абеды для больш чым 120 працаўнікоў. Пра сытнае і смачнае харчаванне работнікаў ААТ "Капыльскае" клапоцяцца загадчыца сталовай сельгаспрадпрыемства Наталля Крэпская, повары Ірына Каціла, Віталь Лазоўскі, кухонная рабочая Настасся Кудрашова.
Боршч, суп, смажанка, гуляш і бульбяное пюрэ, салата са свежай капусты з алеем, чай, морс – самыя папулярныя стравы. А сярод фірменных – курынае філе ў беконе, сырная начынка з грыбамі, запечаны язык, печань па-строганаўску і інш. Усё гэта дастаўляецца на палі, а таксама могуць пакаштаваць і тыя, хто заязджае ў сталовую. Ёсць тут свежая выпечка: булачкі, беляшы. Гатуюць паўфабрыкаты для фірменных магазінаў сельгаспрадпрыемства ў Капылі, Клецку, Нясвіжы: галубцы, шніцэлі, катлеты, якія карыстаюцца попытам.
Самае галоўнае, упэўнены работнікі сталовай, гатаваць ежу з душой і добрым настроем. Магчыма, гэта і ёсць той самы сакрэтны інгрэдыент, які надае іх абедам асаблівы, ні з чым непараўнальны смак.
Фота аўтара