3 октябрҙә Башҡортостан Башлығы Радий Хәбиров Рәсәй Геройы Максим Серафимов исемендәге “Патриот” хәрби-патриотик паркында төбәк юғары уҡыу йорттары студенттары үҙидараһы лидерҙары форумында ҡатнашыусылар менән осрашты. 2 октябрҙән 3-өнә тиклем барған белем биреү сараһында 250 студент шәхес-ара коммуникациялар ойоштороу һәм власть органдары менән үҙ-ара эш итеү буйынса күнекмәләр алды. Йәштәр менән осрашыуҙа Башҡортостан Башлығы буласаҡ белгестәрҙең потенциалын юғары баһаланы. - Һеҙ - студенттар берләшмәһенең әүҙемерәк һәм һәләтлерәк вәкилдәре. Беҙҙең идара итеү командаһына һеҙҙең ҡарашҡа йәштәрҙе нимә борсоуын, белем биреүҙә һәм йәштәр сәйәсәтендә, башҡа өлкәләрҙә нимәне яҡшы яҡҡа үҙгәртеп булыуын аңлау мөһим. Беҙ республикабыҙ һәм илебеҙ өсөн ябай булмаған, шулай уҡ махсус хәрби операция һәм санкция баҫымына ҡаршы тороуға бәйле осорҙо үтәбеҙ. Шулай булыуға ҡарамаҫтан беҙ иҡтисадтың һәм социаль өлкәнең тотороҡло үҫешен тәьмин итергә тырышабыҙ, ҙур проекттарҙы тормошҡа ашырабыҙ. Был ҙур эштәрҙең перспективаларын һәм йүнәлештәрен тиҙҙән һеҙ билдәләй башларһығыҙ. Шуның өсөн уҡыуҙың һеҙгә файҙалы булыуы мөһим, - тип билдәләне Радий Хәбиров. Төбәк етәксеһе шулай уҡ һөнәри белем биреү инфраструктураһының үҫеше тураһында һөйләне. – Беҙ фәнгә һәм юғары мәктәпкә етди иғтибар бирәбеҙ. Был яҡтан яҡшы уңыштар ҙа бар. Беҙҙә донъя кимәлендәге Евразия фәнни-белем биреү үҙәге эшләй, Вуз-ара студенттар кампусы төҙөлә. Был - республиканың иң ҙур белем биреү объекты, унда 4,5 мең студент йәшәйәсәк. Бөгөн белем биреү сифаты һәм вуздарҙың абруйы үҫә. Был йәштәрҙе әҙерләү һәм уларҙың артабанғы профессиональ үҫеше өсөн һәйбәт мөмкинлектәр. Артабан Башҡортостан Башлығы Форумда ҡатнашыусыларҙың һорауҙарына яуап бирҙе. Йәштәр студент медиаресурстары үҫеше, социаль башланғыстарға ярҙам һәм грант конкурстарында ҡатнашыу менән ҡыҙыҡһынды. Шулай уҡ осрашыуҙа спорт инфраструктураһын нығытыуҙы һәм республика халҡын спортҡа йәлеп итеү, төбәктә яңы музейҙар асыу кеүек мәсьәләләр тикшерелде. Башҡортостан Башлығы республиканың идара итеү командаһы студенттар берләшмәһе менән системалы эш алып барыуын һыҙыҡ өҫтөнә алды. Был, атап әйткәндә, студенттар спартакиадаһын, “Студент яҙы” фестивален үткәреүгә, студенттар отрядтарын тергеҙеүгә ҡағыла. 2025 йылдың сентябрендә Өфөлә тәүге тапҡыр юғары уҡыу йорттары һәм колледждар өсөн I курс студенттарына бағышлау үткәрелде. Был сараны йыл да ойоштороуҙы планлаштыралар. Һорауҙарҙың береһе студенттар советында әүҙем ҡатнашыусыларҙы дәртләндереүгә һәм ятаҡта бушлай урын биреүгә ҡағылды. Төбәк етәксеһе бындай мөмкинлекте тикшерергә ҡушты. Төбәк етәксеһе шулай уҡ Башҡортостан Башлығы Кубогына Ҡаршылыҡтар менән йүгереү еңеүселәрен бүләкләне. Өфө фән һәм технологиялар университеты командаһы ярышта еңеүсе булды. Икенсе урында - Рәсәй Эске эштәр министрлығының Өфө юридик институты студенттары, өсөнсө урынды Өфө дәүләт нефть техник университеты вәкилдәре яуланы. Журналистар менән әңгәмәлә Башҡортостан Башлығы студенттар берләшмәһенең республиканың мөһим ресурсы булараҡ әһәмиәтен һыҙыҡ өҫтөнә алды һәм йәштәр менән аралашыуҙың мөһимлеген билдәләне. Мәғлүмәт һәм фото:https://glavarb.ru/ru/news/event/vstrecha-s-liderami-studencheskogo-samoupravleniya-vuzov-bashkortostana-82585/