“Беҙҙең эштә ваҡ-төйәк юҡ”

Бөгөн Ватан һағында торған ир-егеттәрҙең береһе, “Абдул” позывнойлы яугир, хеҙмәт юлын Эске эштәр министрлығының Стәрлетамаҡ идаралығында башлаған. Ҡалала енәйәтселек менән шөғөлләнгән банданы асыҡлау уның тәүге эше була. Хөкөмгә тарттырылыусылар 10 йылдан 25 йылға тиклем иркенән мәхрүм ителә. Был ҡатмарлы эште башҡарғандағы ҡыйыулығы өсөн тыныс тормошта наградаларға лайыҡ була. Аҙаҡ суд приставы булып бер аҙ эшләгәндән һуң, яҙмыш уны Камчаткаға илтә. Балыҡсылыҡ судноһында капитан ярҙамсыһы булып эшләй. 2023 йылда махсус хәрби операция зонаһына үҙ теләге менән йүнәлә. “Абдул” Ростов өлкәһендә хәрби әҙерлек үткәндән һуң штурм бригадаһына эләгә һәм тәүге һуғышта уҡ яралана. “Беҙ өсәү инек. Донецк Халыҡ Республикаһындағы ҡасаба урамдарын дошмандан “таҙартҡанда” дошман беҙҙе йорт эсенә ҡыҫырыҡланы. “Понпон” менән икебеҙҙең дә ҡулдар яраланды. Өсөнсөбөҙ, 18 йәшлек егет, тәүге минутта ҡаушап төштө. Беҙ уны “Егет, әйҙә үҙеңде ҡулға ал!” тип иҫенә килтерҙек. Һәм ул пулеметтан һиптерә башланы. Әгәр ул булмаһа, беҙ был ут эсенән сыға алмаған булыр инек”, – тип хеҙмәттәштәрен иҫенә төшөрә “Абдул”. Штурмлаусылар ғүмере һәр саҡ ҡыл өҫтөндә. Яңы ғына яраларын дауалап сафҡа баҫҡан яугир Орловкалағы икенсе штурм ваҡытында тағы яралана. Ҡабалана-ҡабалана яраны бәйләп, йәнә көстәр тигеҙ булмаған һуғышта позицияларын һаҡлау өсөн көрәшәләр. Был көсөргәнешле һуғыштағы батырлығы өсөн “Абдул” II дәрәжә “Батырлыҡ өсөн” миҙалы менән наградлана. Был яранан һуң өлкән сержантты офицерҙар курсына ебәрәләр. Хәҙер ул - өлкән лейтенант, взвод командиры. Сираттағы штурм мәлендә, дрон-камикадзе һөжүменә эләгеп, “Абдул” йәнә яралана, был юлы аяғы йәрәхәтләнә. “Ошо ваҡыт эсендә беҙ өс-дүрт тораҡты алдыҡ, шулай уҡ бер нисә урман һыҙатын – урмандар ҙа стратегик пункттар. Беҙҙең эштә ваҡ-төйәк булмай. Махсус хәрби операция элекке хәрби бәрелештәргә бөтөнләй оҡшамаған. Танк һөжүмен дошман артиллерия, дрондар һәм ракеталар менән туҡтата. Өҫтәүенә улар тыныс йәшәгән халыҡ артына йәшеренергә оҫтарҙы. Шуға күрә уйлап, ювелирҙарса теүәллек менән эш итергә тура килә. Яйлап яңы тактика барлыҡҡа килде. Нисек кенә ауыр булмаһын, беҙ аҡрынлап дошманды ҡыҫырыҡлайбыҙ. Бөгөн булмаһа, иртәгә беҙ уны еңәсәкбеҙ, сөнки беҙ дөрөҫлөк юлында”, - ти ышаныс менән “Абдул”. Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, 122 йәки (347) 218-19-19-19 телефондары аша Ситуация үҙәгенә, “Минең документтарым” күп функциялы үҙәктең яҡындағы офисына мөрәжәғәт итә ала. Шулай уҡ һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ. Башҡортостанда контракт буйынса хәрби хеҙмәткә саҡырыу дауам итә. Мобиль пункттар республиканың барлыҡ ҡала һәм райондарында эшләй. 2025 йылдың 5 июненән контрактниктарға бер тапҡыр бирелеүсе 1,4 миллион һум (бер миллион һумы– республиканан, 400 мең һумы– федераль бюджеттан) ҡаралған. Әгәр контракт Өфөлә төҙөлһә, дөйөм сумма (муниципаль түләүҙәр менән бергә) 1,7 миллион һум тәшкил итәсәк. Фото: шәхси архивтан.