🇨🇦🇧🇾100 год з дня нараджэння Антона Маркевіча — ураджэнца 🦌 Гродна, старшыні Задзіночання беларусаў Канады, які дамогся, каб бел-чырвона-белы сцяг штогод 25 сакавіка ўздымаўся на ратушнай плошчы Таронта
Антон Маркевіч нарадзіўся 14 кастрычніка 1925 года ў Гродне. З 1944 года жыў у эміграцыі. Дзевяць гадоў (1946—1955) пражыў у Мюнхене, але тады ў грамадскім жыцці не ўдзельнічаў. У 1955 годзе пераехаў у Канаду і хутка далучыўся да беларускай дыяспары. Невялікі час пасля пераезду быў абраны сакратаром Задзіночання беларусаў Канады, а ў 1958 годзе стаў старшынём Галоўнай управы арганізацыі.
Разам з Кастусём Акулам ён заснаваў выдавецка-мастацкі клуб «Пагоня». Сябры клуба выраблялі значкі і пярсцёнкі з «Пагоняй», а залатымі і сярэбранымі значкамі адзначалі выбітных беларусаў за ўнёсак у культурнае і грамадскае жыццё.
Маркевіч супрацоўнічаў з амерыканскай газетай «Беларус», публікуючы артыкулы пра жыццё канадскіх беларусаў пад імем Хвядос Прылепскі або псеўданімам А—віч.
У 1965 годзе, жывучы ў Ошаве, ён дамогся, каб бел-чырвона-белы сцяг штогод 25 сакавіка ўздымаўся перад гарадской ратушай побач з канадскім. У 1970 годзе разам з Вінцэнтам і Раісай Жук-Грышкевічамі дасягнуў дамоўленасці з мэрыяй Таронта аб штогадовым узняцці беларускага сцяга на ратушнай плошчы.
Як прадстаўнік беларускай супольнасці Маркевіч быў запрошаны на ўрачысты абед у мэрыі з удзелам брытанскай каралевы Лізаветы II падчас яе візіту ў Таронта. Таксама ён арганізаваў штонядзельныя паўгадзінныя радыёперадачы на беларускай мове на радыёстанцыі ў горадзе Оквіл.
Памёр канадскі гродзенец 9 лістапада 2009 года ў Ошаве.
