Вуз-ара кампуста Ҡытай теле һәм мәҙәниәте үҙәге асыла

Вуз-ара кампуста Ҡытай теле һәм мәҙәниәте үҙәге асыла Рәсәй менән Ҡытай Халыҡ Республикаһы араһындағы мөнәсәбәттәрҙең әүҙем үҫеше фонында был мөһим ваҡиға булып тора. Был үҙәк төбәгебеҙҙә ҡытай телен һәм мәҙәниәтен үҫтереүгә йүнәлтелгән белем биреү һәм мәҙәни майҙансыҡ буласаҡ. Кампуста балалар, мәктәп уҡыусылары, студенттар һәм оло тыңлаусылар өсөн ҡытай дәресе курсы алып барыла, халыҡ-ара HSK имтиханына әҙерлек курсы, ҡытай каллиграфияһын, декоратив сәнғәт төрҙәрен өйрәнеү буйынса дәрестәр үткәрелә. Бынан тыш Үҙәктә Ҡытай традициялары һәм хәҙерге заман мәҙәниәте менән танышыуға йүнәлтелгән мәҙәни саралар үткәреләсәк. Үҙәк Ляонин университеты менән хеҙмәттәшлек итәсәк. Онлайн-платформала Ляонин университетының профессорҙары ҡытай телен яҡшы белгәндәргә тел компетенцияларын камиллаштырыу өсөн дәрестәр ойошторасаҡ. -Вуз-ара кампуста Ҡытай теле һәм мәҙәниәте үҙәген асыу республика халҡы өсөн мәҙәни-ара диалогты үҫтереүҙә һәм белем биреү мөмкинлектәрен киңәйтеүҙә мөһим аҙым буласаҡ, - тип билдәләй Өфө фән һәм технологиялар университеты ректоры Вадим Захаров. - Сөнки уның маҡсатлы аудиторияһы беҙҙең юғары уҡыу йорто вәкилдәре генә түгел, ә был проблема менән ҡыҙыҡһынған һәм шөғөлләнгән барлыҡ кешеләр. Ҡытай теле һәм мәҙәниәте үҙәге Ҡытайҙың юғары уҡыу йорттары һәм ғилми учреждениелары менән күптәнге ныҡлы бәйләнештәре булған Өфө фән һәм технологиялар университеты нигеҙендә эшләйәсәк. Хәтерегеҙгә төшөрәбеҙ, тәүге бәйләнеш 1998 йылда уҡ Башҡорт дәүләт университеты (хәҙер – ӨФҺТУ) һәм Хунань педагогия университеты араһында булдырылғайны. Бөгөн Өфө фән һәм технологиялар университеты Ҡытайҙың 20 университеты менән уңышлы хеҙмәттәшлек итә. Йыл һайын Ҡытай һәм ӨФҺТУ вуздарынан 100-ҙән ашыу студент академик мобиллек программаһында ҡатнаша. Өфө фән һәм технологиялар университеты хеҙмәткәрҙәре - йәш ғалимдар - Башҡортостан Башлығы гранты сиктәрендә Ҡытай мәғариф һәм ғилми учреждениеларында ғилми стажировка үтеү мөмкинлегенә эйә. Белешмә Евразия Фәнни-белем биреү үҙәгенең юғары уҡыу йорттары араһындағы студенттар кампусы Рәсәй Президенты ҡушыуы буйынса һәм Рәсәй Мәғариф һәм фән министрлығының «Фән һәм университеттар» милли проектын тормошҡа ашырыу сиктәрендә төҙөлә. Өфө кампусы проекты - 4,3 мең кешегә иҫәпләнгән торлаҡ биналары, уҡыу-ғилми комплексы, лабораториялары, эшлекле зоналары, магазиндары, уңайлы скверҙары һәм башҡа уңайлы ҡала мөхите объекттары булған студенттар өсөн урын. 2030 йылға илдә 25 кампустан торған селтәр барлыҡҡа килергә тейеш. Был йүнәлеш буйынса эште РФ Хөкүмәте һәм Рәсәй Мәғариф һәм фән министрлығы алып бара. Әлеге ваҡытта “Йәштәр һәм балалар” милли проекты ярҙамында 24 ошондай студент ҡаласығы проектлана һәм төҙөлә. 2036 йылға кампустар һаны 40-ҡа тиклем артасаҡ. Мәғлүмәт һәм фото сығанағы: https://pravitelstvorb.ru/news/27582/