“Ватан һаҡсылары” фонды филалы Башҡортостанда 2023 йылдың 1 июненән эшләй башланы. Бөгөн уның социаль координаторҙары ҡарамағында 42 меңдән ашыу кеше бар. Социаль координаторҙар махсус хәрби операцияла ҡатнашыусыларға һәм уларҙың ғаиләләренә, һәләк булған яугирҙәрҙең тол ҡатындарына тейешле документтар төҙөргә, ярҙамдан ҡулланырға, һаулыҡтарын нығытырға, ҡабаттан уҡыу үтеүгә, тыныс тормошҡа ҡайтырға булышлыҡ итә. Яугирҙәр - элекке педагогтар, остаздар, тренерҙар... Ҡайһылары тураһында бөгөн һөйләп үтмәксебеҙ. Күмертау ҡалаһынан Иван Барышев үҙ тормошон уҡытыусылыҡ эше менән бәйләргә теләй һәм Күмертау педагогия колледжына инә. Һалдат хеҙмәтен махсус тәғәйенләнештәге ғәскәрҙәрҙә үтә. Күнекмәләр, йыйындар, яландағы тренировкалар уны нығыта. 2022 йылда махсус хәрби операцияға юллана. Холҡо, рух ныҡлығы уны хәрби тормошҡа әйҙәй. Иван Барышев Донецк, Запорожье, Луганск йүнәлешендәге яуҙарҙа ҡатнаша. Өйөнә ҡайтҡандан һуң үҙе өсөн яҡын булған 10-сы мәктәпкә физкультура уҡытыусыһы булып эшкә урынлаша. Әле ул Күмертау ҡалаһы хакимиәте башлығы ҡарамағындағы кадет ротаһы кураторы, кадет кластарында махсус предметтарҙы һәм физкультураны алып бара. Сибайҙан Илмир Теләүсин – юғары категориялы технология уҡытыусыһы. Ул кандидатлыҡ эшен яҡларға йыйына, ғилми журналдарҙа мәҡәләләрен баҫтыра. Махсус хәрби операция Илмирҙең тормошон ҡырҡа үҙгәртә. Хәрби тәжрибәне ул тиҙ туплай. Артемовск йүнәлешендә БМП-2 оператор-наводчигы дәрәжәһендә хәрби хеҙмәтен үтәй. Һуңынан штурмлау төркөмөнә күсерелә. Уның составында яралы хәрбиҙәргә тәүге медицина ярҙамы күрһәтә, уларҙы хәүефһеҙ урындарға күсерә. 2023 йылдың сентябрендә яралы иптәшен ҡотҡарыу буйынса хәрби бурысын үтәгәндә ҡаты яралана. Күрһәткән батырлығы өсөн Суворов миҙалы менән бүләкләнә. Демобилизациянан һуң Илмир элекке эшенә ҡайта. Технология уҡытыусыһын уҡыусылар менән осрашыуҙарға саҡыралар, ул унда шиғырҙарын да уҡый. Учалы районынан Рушан Ғүмәров – физкультура уҡытыусыһы. Контракт төҙөр алдынан оҙаҡ уйлана. Ул төньяҡ йүнәлештә хәрби хеҙмәттә була. Үҙенең уҡыусыларына иҫән ҡайтыу өмөтө тормошҡа аша. Телефонында баскетбол буйынса мәктәп командаһының фотоһүрәттәрен һаҡлай. Дрондарҙың һөжүме ваҡытында ауыр яра ала. Яугир ҡабаттан атларға өйрәнә. Ҡатыны эргәһендә һәр ваҡыт ярҙам итә. Быйыл ғинуарҙа яраланыуы сәбәпле өйөнә ҡайта. 2025 йылдың сентябрендә хәрби хеҙмәттән азат ителә, операциянан һуң элекке эшенә - физкультура уҡытыусыһы булып ҡайта. Фото: “Башинформ” мәғлүмәт агентлығы.